Addis Ababa:- Sa”i honsu agani giddo 9 miliyoone birre ale dagatenna mootimmate jiro hafanfarretenni gatisa dandiinoonnita xawinsi.
Qoqqowu mootimma akatoomunna tsere mussinnu komishiine 9 agani mixote gumulsha keenatenni aantino aganna giddo illacha uyine loonsanni hajubba lainohunni komishiinete massagaano, manaajimentete bissanna ogeeyye afantinowa Doore Baafannote quchumira maltino.
Hasaawu bare fantinoti qoqqowu akatoomunna tsere mussinnu komishiine komishiineritte dukko Zelaalem Lemma xawissino garinni; mussinnu jaddo gobbate jironna miinju aana iillishshanno hi`naancho xiiwo gobbaanni gobbate diigammera, manchi beetti reyoranna keeru hoongira hattono qarru aana tugganno jaddooti yite coyidhino.
Qarru iillishannoha miinju, dagoomittetenna poletiku xiiwo sharramate ragaannino komishiine hala`lado looso loossanni afantannota coyidhe babbaxxitino bissa ledo qinaawatenni loonsoonni loosinni haammata mootimmatenna dagate jiro danunninna woxunni gatisa dandiinoonnita xawissino.
Amadisiisseno kaphu rosu tajenni assinoonni loosu qixire ragaannino komishiine qorqorate looso gumulate aana afantannota coyidhino.
Komishiine mussinnu jaddo gumulamasera albaanni balaxote gargadhate loosi aana illachishshe loossannota xawissinoti komishiineritte; balaxote gargadhatenni sa`ino hajubba hajo la`anno bissara sayisatenni seerunni xa`mamaano ikkitanno gede assate loossa loossanni nootano ledde xawissino.
9 aganiha loosu gumulshi ripoorte shiqishinohu komishiinete latishshi mixo, baajetete qixxaawo harunsonna irkote dayirekitoreete dayirekiterichi kalaa Belay Bangasa isi widoonni xawisino garinni; honsu agani giddo komishiinete 371 qaxxaro iillitinota coyi`re konni giddonni mussinnu jaddora soorramansara albaanni harinshote aana noo hajubba aana assinoonni wiinamu gargadhete loosinni 9,081,968.81 miliyoone birra mootimmatenna dagate jiro hafanfarretenni gatisa dandiinoonnita xawisino.
Komishiine mussinna gargarate hayyo aana illachishshe loossanni afantannota qummeessinohu dayirekiterichu; amadisiisse gumultanno loossa mereerinni ilama danchu akatoominni suwisa mitto ikkinota kaysatenni konni ragaannino qajeelshu loossa loonsoonnitano huwachishino.
Jirote borreessammenna halaalaanchimma qora wole mussinna gargarranni hayyo ikkitinota buuxisinohu kalaa Belay; mussinnunna bainchu assootira reqeccaabbino uurrinshuwa badatenni uurrinshuwate loossanni afantanno loosaasinenna massagaanote jiro qorqoratenna borreessate looso mixote aleenni gumula dandiinoonnitano shiqishino ripoortenni huwata dandiinoonni.
Jeefoteno komishiineritte shiqqino ripoorte kaiminni kaajjillunni la“antinori kaajjite suffanno gedenna taashsha hasiissanno hajubba aana gattino aganna giddo illachinshe loonsanni gede raga wortino.
Gaazeexu Odeessaanchinni
Bakkalcho Dotteessa 24, 2016 M.D
