Addis Ababa:- Kaote ayyaana korkaata assatenni laalchu anjenna saibbo waagu lexxo heedhannokki gede balaxotenni hananfe kaajjinshe loonsanni keeshshinoonnita Sidaamu Qoqqowi Daddalunna Dikkote Latishshi Biiro egensiissu.
Biirote Layinki Sooreessi kalaa Burqa Buxxuula Itophiyu pireesete uurrinshara xawisanni; ayyaanaho shiqanno laalcho batinyunninna isilanchimmatenni dikkote shiqanno gede assate loonsanni keeshshinoonnita coyi’rino.
Laalcho batinyunninna isilanchimmatenni shiqanno gede, saibbo waagu lexxo heedhannokki gedenna allaggichore karsiisse hirtanno daddalaano seerunni xa’mamaano assateno hajo la’annonsa bissa ledo qinaambe loonsanni hee’noonnita kaysino.
Konninni, geexaanote maamarranna mittimmate loosi ejense ledo sumuu yinoonni garinni lamalate dikko kaajjishatenni insa widoonni shiqanno laalcho Hawaasi quchumiranna zoonnate qara quchummara qixxeessinoonni basera laalcho dikkote shiqishshanno gede assinoonnita xawisino.
kalaa Burqi xawishshi garinni; sagalete gide qixxeessitanno Industirrano laalchonsa dikko shiqishshanno injoo kalanqoonni.
Qoqqowoho xaphooma 377 geexaanote maamarra noota kayisannohu Sooreessu; kuri mereerinni xaa yannara 124 maamarra albinni roore luphi yite mootimma dukkana qixxeessiteenna lamalate dikkora laalchonsa dagate shiqishshanni afantannota kulino.
Hawaasi quchumirano 68 maamarra laalcho dikkote shiqishshanni e afantannota qummeessino.
Mootimmate widoonni shiqqanno Zayte, Bulleenna Sukkaarete shiqisho lainohunni kayisanni;
Ikkollana, xaa yannara addi addi korkaatinni mootimmate widoonni shiqqanno Zayte shiqqo uurritinoha ikkanna; Sukkaare kayinni albiwinni batinyu anje heedhurono xaa yannara 2803 kuntaali Sukkaare Elto, Wolliimmanna Alle bejimlu ejensuwa geexaanote maamarransa widoonni dagate tuqissanni afantannota egensiisino.
Saibbo waagu lexxo ajishate geexaanote maamarra dhuka kaajjishanna noonsa laalcho fushshite lamalate dikkora hirtanno gede assate yaannohu handaaru Sooreessi; ayyaana balba’lite saibbo waagu lexxo kalaqqanno daddalaano aana seeru qaafo adhinannita kule; tenne harunsitanno wolqa uurrinsoonnitano buuxisino.
Daga hiikkonne laalchono geexaanote maamarrawinni calla hidhitanno gedenna saibbo waaga ledde hirtannore seeriweelo daddalaano qooxeessinsara afantanno ga’labbote bissara qummeessatenni halantanno gede huwachishino.
Qorqorshu looso ayyaanu gobbaanni heedhanno yannarano kaajjinshe sunfannita kalaa Burqi lede egensiisino.
Qiddist Gezzaheny
Bakkalcho Dotteessa 24, 2016 M.D
