Sidaamu Dagoomi Qoqqowi Saadate Jiro Latishshi qulxu`mu jiro latishsha lainohunni Yirgalamete quchumura qulxu`mu latishshinni bobbakkino maabarra towaanyo assinoonni. Qoqqowoho Maatete jireenya buuxisiisate 14 doorantino woraddara qulxu`mu jiro latishsha halashshate loonsanni hee’noonni.
Towaanyote yannara IFDR Giwirinnu Ministeere Saadatenna Qulxu`mu Jiro Handaari Minister dieetichi Dr Fiqiru Raggaasihu coy`ranni, Sidaamu qoqqowi maatete jireenya buuxisiisate loosanni noo loosi wolootta qoqqowubarano lawishsha ikkannoho; konne ikkeenne techo towaantanni hee`noommohu Yirgaalamete qulxu`mu latishshi loosi konne leellishannoho.
Sidaamu Qoqqowi wedella tantane way bale qixxeessatenni qulxu`mu laalcho laashshitanno gede assinota illesinni lainota coy`re;konninni wedellu horaameeyye ikkitinotano buuxinota naqqasino.
Maatete jireenya hananfinkunni mitto dironna boco ikkinota qaagiissinohu Minister dieetichu; tenne yannara gobbate gede haammata soorro dagginota huwachishino.
Qoqqowu Saadate Jiro Latishshi Biiro Sooreessi Kalaa Tekle Jomba isi widoonni, qoqqowu maatete jireenya buuxisiisate lamala paakeeje mixi’re loosu widira einnota kul;, konni giddo mittu qulxu`mu jiro latishsha ikkinota kulino. Konni loosu handaarinni haammata daga horaameeyye ikkitanni noota kaysino.
Sidaamu Qoqqowi qulxu`mu jiro latishshi looso doorantino, way noowanna wo`ma yannara lagu ha’rannota 14 woradda giddo looso halashshe loosanni noota buuxisinohu Sooreessu; konni handaarinni ontu kumi ali qansootinna looso hasidhanno wedelli beeqqaano ikkitinota hasaawino.
Kalaa Tekle xawishshi garinni, qoqqowu irko assanna qulxu`mu latishshi loosi widira e`inori 12 interipirayzootunna 4 jajjabba mittimmate maabbarra no. Tini maabbarra xaa yannara gummaamma ikkitanni dagginotano egensiisino.
Kalaa Tekle, “Sidaamu giddo lamu garinni qulxu`mu latishshi looso loonsanni; umihu kalaqamu garbinna kofote aana ikkanna, layinkihu loosidhe galtino daga baattora gate mootimma hasiisanno uduunne shiqishshanna dagano way bale qixxessite latissanno doogooti” yiino.
Qulxu`mu aana qara gede loonsannihu way bale qixxeessa, qulxu`mu caacurre tuqisanna laalcho gamba assa ikkanna; 370 ale way bale qixxeessatenni 62 kumi ale ikkanno qulxu’mu caacurre tuqinsoonni; saiha honsu aganira 3008 toone qulxu`mu laalcho gamba assano dandiinoonnita egensiisino.
Gaaddisi Aregihu Yirgaalamete quchumira Semira qulxu`mu laalchi maabari giddo gambisaanchoho. Towaanyo assinoonni maabarra giddo mitto ikkanna;mittu xibbii kumi kaimu kaapitaalenni loosu giddora e`inota coy`re; mitte lamala giddo kumu ale ikkanno qulxu`me gamba assitannota kulino. Tenne yannara konni loosu handaarinni loosse lame miloyoone ali kaapitaale suuqidhinotano hattonni.
Wedellichu Gaaddisi, looso hoogge mullawa yannansa huntanni noo wedelli konni loosi aana bobbakkuro horaameeyye ikkitannotano amaalino.
Abrahaam Saamueel
Bakkalcho Dotteessa 24, 2016 M.D
