Addis Ababa:– Sidaamu qoqqowi lee kifilenna settikki kifile rosaanora goofimarchu fonqolo aate qixxaawosi jeefisanni noota qoqqowu rosu biiro xawissu.
Sidaamu qoqqowi layinki pirezidaantichinna qoqqowu rosu biiro sooreessi kalaa Beyyene Baraasa Itophiyu pireesete uurrinshara xawisino garinni; leekki kifile fonqolo onkoleessa 29-30/2016 M.D geeshsha aate mixi`noonniha ikkanna; settikki kifileha qole ella 4-5/2016 M.D geeshsha aate mixi`noonni.
61 kumi rosaano 6ki kifile fonqolate mixi`noonnitanna xaa geeshsha 51 kume rosaano borreessantinota xawise; lawino garinni settikki kifile rosaano 79 kumi geeshsha mixi`noonniha ikkanna; xaa geeshsha 72 kume ale rosaano borreessantino yiino.
Kalaa Beyyene xawishshi garinni rosaano fonqoloho qixxaabbanno gede baxxitino qixxaawote millimmo assinanni hee`noonniha ikkanna; baxxinohunni leekki kifile goofimarchu fonqoli qoqqowu deerrinni uynanna haaro ikkasi ledo amadisiisame rosaanonna ila ayiddi tii“u qixxaawo assitanno gede balanxe loonsanni keeshshinoonni.
Ikkinohurano rosaano gumaamma ikkitanno gede diru roso garunni guddanno gede assatenninna ledotenni titooriyalete roso aantaano pirogiraamenni afidhanno gede irko assinanni hee`noonnita xawisatenni; konne irkissanno ogeeyye gaamantinotano coyi`rino.
Konni albaanni settikki kifilenni sa`nanni guma qoqqowubba uminsa bixxille fushshitannota qummeessinohu sooreessu; xaa yannara kayinni Sidaamu qoqqowi 50 bixxille ale abbitino rosaano calla sayisate kaajjado muro mure qixxaawo assanni afamanno yiino.
Sooreessu coyi`rino garinni; qixxaawo gumaame assate woradu deerrinni rosu minna qinaabbe rosanna rosiisate harinsho illachunni loossanni no; qoqqowu deerrinnino massagaanonna rosiisaano gutunni Hawaasi quchumiranna shoolente zoonnara fonqolu qixxaawo jeefissanni no.
Fonqolu attamo qixxaawo lainohunni balanxe hananfe gudate mixi`ne loonsanni hee`noonnita xawisinohu Kalaa Beyyene; fonqolamaanote borreessamme jeefisantanni no yiino.
Fonqolu moori rosaano gawajjanni nootanna konne gatisate baxxino garinni rosaano kifilete rosinni irkisa hasiissannota coyi`re; fonqolu fojo agarante gumulantanno gede qorophotenni loonsanni hee`noonnitano buuxisino.
Sooreessu ila ayiddiranna fonqolamaanote hattono baalunku rosu dagoomira dancha fonqolu yanna ikkitanno gedenna gumaamma rosaano kalaqantannoha ikkanno gede halchosi xawisino.
Abbebech Maatewoos
Bakkalcho Dotteessa 24, 2016 M.D
