– Qeellete barra lainohunnino bero ikke sainorichinni rosicho adhine aantete Jawaata qansoota ikkino
Mootichu sutamatenna ka’’ote ayyaani mannu oosora lowo baatooshshe baatino qaaggote barra ikkino daafira ammanaanote jawa tiro afi’rino barra ikkinota Sidaamu qoqqowi pirezidaantichi kalaa Desti ledamohu. Coyi’ri.
Pirezidaantichu albankeenni ayirrinsanni mootichu sutamatenna ka’’ote qaaggo hattono qeellete barri ayyaanna lainohunni hawalle iillishino’ne yitanno sokka sayisino. Daanno Sambata Dotteessa 27/2016 MD Yesuusi kaote ayyaaninna qeellete barri mittimma ayirranno barraati.
Pirezidaantichu ka’’ote ayyaani ledo amadisiise sayisino sokkanni; amma’note yaa yesuusi leellishinonke baxillenna cubbaataammaho araaraho baantoonni waaga ikkasi kayse; badhera qo’linikkinni elto aate waagaati.
Tenne heeshshonke ledo xaadinseemmo woyte mimmitonke towaatatenni Yesuusi leellishinonke baxille hakko garinni leellisha hasiissannonke.
xaphi assine la’nanni woyte ka’’ote ayyaani danchummate, qeellete, hexxote,halammetenna kaa’lammete ayyaanaati; konni garinni ayyaana ayirrisa hasiissanno.
Ayyaana ayirrinseemmo woyte hoongohura beehatenni, hagiidhine hagiirsiisatenni, kalaqaancho tashshi assanno yine hendanni assooti baalunkunni mimmitu ledo towaatamatenni ayirrisa hasiissannota Pirezidaantichu huwachishinno.
Gobbate gedeno ayyaana ayirrinsanni woyte hedeweelcho kalaqantara dandiitanno danonni qoropha hasiissannota qaagiisse Pirezidaantichu; ga’labbono agarantinota ikka hasiissanno yiino. Konni ledo amadiise qoqqowu garinni ayyaanu ledo amadante dano kalaqantannokki gede ikkado qixxaawo assinoonniha ikkirono; dagano uminsa qeecha fula hasiissannonsata qummeessino.
Jeefoteno ayyaanu qeellenniha, hagiirrunniha, hoongoommore afi’neemmohanna danchummanniha ikkanno gede halchosi xawisino. Dotteessa 27 gobboomu Qeellete barra ayirrinsanniha ikkasinni balaxe sokkasi sayisinohu Pirezidaantichu sokkasinni; baalunku bero ikke sainorichinni rosicho adhine aantete noo yannara jawaata qansoota ikkino yaanni huwachishinno.
Amadisiisatenni gobboomu deerrinni beroo barra ayirrinse sa’noonni loosaasinete barrirano hawalle iillishi’ne yiino.
Loosaasinete yaa gobba soorranno mannaati; looso loosa owaantete, gummaa’mate, meessaneetenna gobba lossate yee; kuni barri konni manni guma ayirrinsanni barraati; konni daafira baalunku loosoho jawaantoommore, bilchaantoommorenna guma reekkinseemmore ikkino yaanni sokkasi sayisino. Loosannohu baalunku gumaho loosanno gedenna abbino guminni gobbasinna dagasi woyyeessanno gedeno lede qaagiissino.
Qiddist Gezzaheny
Bakkalcho Dotteessa 24, 2016 M.D
