Addis Ababa:- Amma’note harunsaano Kaote ayyaana ayirrinsanni woyte Mootichu Kiristoosi lawishsha harunsatenni ikka hasiissannota amma’note annuwi huwachishshu.
Ga’a ayirrinsanni sutammete ayyananna Sambatu barra ayirrinsanni kaote ayyaana lainohunni addi addi amma’note uurrinsha massagaano Itophiyu pireesete uurrinshanni ledo assitino keeshshonni; ilama kiristoosi kaote ayyaaninni baxille,halammenna hajajama rosa hasiissannonsata qummeessitino.
Addis Ababu Mekaane Semait Qullaawu Qirqoosi amma’note mini wongeelu soqqamaanchi Birhaanehiwoot Girmay xawisanni; Kirisinnu amma’no baalunku Mootichinke Kiristoosi kaote ayyaanira hawalle iillishi’ne yee; Kiristoosi manchi beeettira leellishinohu baxillenna gatona yaa ikkinota coyi’rino.
Baxillu ayyaanaamoho; uullate hee’neemmo woyteno keerinkera kaimaho yee; baxillu hee’riro mimmito macciishsha, ayirrisamanna halama heedhannota kulino.
Gobbankera xaa yannara sa’e sa’e kalaqantanno gaancubbara kaimu ayyaanaamu rosinni xeerti’rankeeti yiinohu wongeelu soqqamaanchi Birhaanehiwooti; konnirano Magano waajjanna keeru daafira loosa hasiissannoke yiino.
Ilama Kiristoosi kaote qeelle ayyaaninni baxille, halammenna hajajama rosa noonsatano huwachishino. Ayyaanaamo roso seekkine rosatenni mereeronke keere kalaqa noonke yee; amma’no sayissanno rosicho lawashshi yiniro tiiunnino ikko maalunnino gawajjammannita kaysino.
Rosiisaanchu xawishshi garinni; amma’note roso garunni harunsa hoogatenni gobbankenna daganke gawajjineemmo; konnira Yesuusi Kiristoosi lawishsha garunni harunsa hasiissannonke.
Kaote Caabbichiwa iillateno Yesuusi Kiristoosi manchi beetto cubbunni gatisate saysino shetto baala qaaga hasiissannota kayse; ayyaanu baxille, gatona yaa, ayirrisamanna hajajama rosiisannohanna gobbanke keerira baalinke jawaantetenni loonseemmoha ikka noositano lede huwachishino.
Itophiyu Kaatolikete amma’no massagaanchi Bitsui Kaardinaal Abune Birhaane Iyyeesuusi isi widoonni; ayyaana ayirrissannore tayxehu Mootichu Kiristoosi kaote ayyaanira hawalle iillishi’ne yitanno sokkasi saysino.
Ayyaana ayirrinseemmo woyte qarrantinore kaa’latenni, qaensanni darantino qansoota towaatatenni hattono dhuku noonsakkire irkisatenni ikka hasiissannota coyi’rino.
Bitsui Kaardinaal sokkasinni; Kiristoosi rosiisinonkehu keerehonna baxilleho yee; xaa yannara gobbate giddo kalaqantanno qarrubba baalanta tirate keeru hasiisanno daafira; baalunku gobbankenna daganke keeri daafira sharrama hasiissannota qaagiissino.
Itophiyu Wongeelu Roobooti amma’note mini loosu massago boorde gambisaancho ikkinohu Paaster Yooseef Yotona saysino sokkanni; Kiristinnu amma’no harunsaano baalanta hawalle kaote ayyaanira iillishi’ne yiino.
Amadisiiseno, Wo’manti Kiristinnu amma’no harunsaano ikkito gobbanke daga baalanti Mootichu Yesuusi Kiristoosi kao qeelle ayyaani korkaatinni ayyaana ayirrinseemmo woyte qarru giddo noore towaatatenni; xissantinore xa’matenni; hoogginore kaa’latenni Mootichu Yesuusi Kiristoosi lawishsha assootunni leellishsha hasiissannota sokkasi saysino.
Bakkalcho Dotteessa 24, 2016 M.D
