Addis Ababa:- Itophiyu qarru giddoonni sa`inoti qeelama giwate jawaante miinju ge’nenna laalchimma balaxissino tantanantino miinju woyyaambe loosisenni xawisantanno yee Xaphoomu ministirchi Abiy Ahimed (Dr) xawisi.
Xaphoomu ministirchi Abiy Ahimed (Dr) ledosi hadhino gaamo ledo tenne lamalara Keeniyaho qixxaabbino 21ki kalqoomu latishshu maamari songo beeqqitino.
Xaphoomu ministirchi Abiy songote aana assino hasaawinni; Itophiyu qarru giddoonni sa`inoti qeelama giwate jawaante miinju ge`nenna laalchimma balaxissino tantanantino miinju woyyaambe loosisenni xawisantanno yiino.
Gobboomitte amaalamme komishiinenni massagamanno loosinni amaalammenna araaru keeri hasattonkenna macciishshammenke gurdaasinchooti yiinohu Xaphoomu ministirchi; roso iillado assatenni saeno wedella ikkadda assatenni Itophiyu 2 miliyoone haruudde loossa kalaqate mixo amaddinota coyi’rino.
Haanja haruma labbino hala`lado millimillonni hattono qooxeessu ledo sumuu yitanno caabbichu wolqa baalunkura tuqisatenni, dijitaalete reekkonna kalaqamu qooxeessu agarooshshi loossa gumulateno illacha uytinota coyi’rino.
Barete aana kalqoomu latishshu maamari Ahigurete assanno irko kaajjishanno gede Itophiyu woshshatto shiqishshino.
Songo Afriku latishshira woxu irkonna balaxote illachu handaarra leellishate hattono hajote aana illachishate maltannota ikkitinota xawinsoonni.
Woxu irko shiqishshannori 21ki maamaru songonni irkonsa ledate illachishshanno gede qummeessate mixo amaddino bare ikkitinota buuxinsoonni.
Shiqqanno irko Afrikaho latishshu qarrubbanna dancha kaayyo bande garunni massagate lowontanni hasiissannota xawinsoonni.
Abbebech Maatewoos
Bakkalcho Dotteessa 24, 2016 M.D
