– 71 Miliyoone qansooti xalala anganni waa afidhanni no
Addis Ababa:- Mootimma waayi wolqa iillo lossate hallanyunna latishshu uurrinshuwara hasiissanno irko assitannota waayinna wolqate ministere egensiissu. xaa yannara 71 Miliyoone qansooti xalala anganni waa afidhanni afantannota xawinsoonni.
Ministere handaarao bobbakkino addi addi kalqoomu latishshu uurrinshuwa ledo hasaabbino.
waayinna wolqate ministirchi Injiner Habtaamu Itefahu ba’rete aana coyi’ranni; mootimma waayinna wolqate iillo lossate bobbakkanno hallanyu latishshu uurrinshuwara hasiissanno irko assitanno.
Mootimma anganni waayinna baadiyyete wolqate iillo lossate latishshu uurrinshuwa ledo loossanni afantanno yinohu ministirchu; mannoomittete hajubba irko lendanna anganni waayinna wolqate shiqisho mitteenni loonsanni hee’noonnita coyi’rino.
Kalqoomu baanke anganni waayinna wolqate iillo aana irko assitannota qummeesse; Yuniseefeno latishshu uurrinsha widoonni mannoomittete kaa’looshshe assitanni afantanno.
Gobbate anganni waayinna wolqate iillo lossate loonsanni hee’noonnita kayisinohu ministirchu; baxxinohunni kalqoomu baanke, Yuniseefe, Neezerlaandetenna Deenimaarkete Imbaasuwa lendanna Afriku latishshu baankenna babbaxxitinori latishshu uurrinshuwa halamaano ikkansa huwachishinno.
Mite mite latishshu uurrinshuwa aana leellanno qarra gatisate harunso assinanni hee’noonnita kule; latishshu uurrinshuwa woxi hendoonni illachira hosanno gede loonsanni hee’noonnita qummeessino.
Baattotenni burqanno waayi aana investe assitanno dureeyyera mootimma hasiissanno irko assitanno yinohu Injiner Habtaamu; Riil Isteetete, Hoteeletenna Rizortete bobbakkino dureeyye baattote woriidi waa unte dagoomaho shiqishshanno gede jawaachinshanni yino.
baattotenni umme waa fushshate hasiissanno maashinna aana dureeyye beeqqo assitara hasiissannota kule; dureeyye fajjo fushshidhe handaaraho bobbaha dandiitannota xawisino.
Itophiyaho 71 Miliyoone qansooti xalala anganni waa afidhanni no yinohu ministirchu; kunino mereerimunni 68 anga xibbuunni ikkinota qummeessino.
kipho, moollenna kalaqamu dano qarri noonsa qarqarto wirro qolte latissanno gede assate looso gumullanni hee’noonnita qummeesse; baxxinohunni Amaaru,Tigrayetenna gamunni Oromiyu qoqqowubbara loonsanni hee’noonnita buuxisino.
wolqate shiqisho lossate daga qooxeessinsara wolqa afira dandiitanno doorshi shiqanni afamannota xawisatenni baxxinohunni arrishshote wolqa shiqisho, Baayogaaze, wolqa ajishshanno teknolooje tuqisate looso gumullanni hee’noonnita ministirchu huwachishinno.
Qiddist Gezzaheny
Bakkalcho Dotteessa 17, 2016 M.D
