Addis Ababa:- Wodiidi Sidaami Zoone Daarrate woradira Woradaho konni albaanni daddalaanote shallagote buuxo assine iillinoonniha 844 kumi ale birra hafanfarino woxe qolsiinsoonnita Woradu Eote Biilloonyi Sinu Borro mini egensiisi.
Woradu Eote Biilloonyi Sinu Borro mini sooreessi kalaa Isheetu Beqqele Itophiyu pireesete uurrinshara xawisino garinni; Woradaho amandoonnihu 2016 eote dirinni ganyete eo 85 miliyoone birra gamba assate mixi’noonniha ikkanna; sa’u honse agannara 58.9 miliyoone birra gamba assa dandiinoonni.
Kunino, ganyete eo gumulshi xibbuunni 69.4% ikkannota xawisino.
Sa’u honse aganna mixo kayinni 63.7 miliyoone birra ikkanna gumulshu 58.9 miliyoone birra eo gamba assinoonnita xawisinohu Sorreessu; kunino xibbuunni 92.5% gumulama dandiinota buuxisino.
Maazzagaajju minna eo lainohunnino diru giddo 18.4 miliyoone birra eo gamba assate mixi’noonniha ikkanna sa’u honse aganna gumulshi 14.2 miliyoone birra ikkanna; kunino diru mixonni ledo heewisiinsiro xibbuunni 78% ikkasi kulino.
Diroho gamba assate mixo amandoonniti ganyetenna maazzagaajju minna eo xaphoomunni 103 miliyoone 458 kume 237 birra ikkanna; gumulo 71 miliyoone 536 kumenna 741 birra eo gamba assa dandiinoonni.
Xaphooma eote mixo honse agannati kayinni 77.5 miliyoone bira ikkanna konni giddonni 71.5 miliyoone birra eo gamba assa dandiinoonnita Sooreessu buuxise; kunino xibbuunni 92.2% ikkasi kulino.
Woradaho xaa yannara deerra “C” 725, deerra “B” 25 hattono deerra “A” 28 giwiru baataano nootano kalaa Isheetu lede xawisino.
Konni albaanni sae sae leellannoha giwire maaxatenna awaawurate hattono owaatamaanote darrasanya aa hoogate assootubba gargarateno baxxinohunni Vaatete darrasanya aa noonsari daddalaano darrasanya garunninna ammanamatenni uytanno gede illachunni harunso hee’noonnita huwachishino.
Xaa yannarano deerra “A” daddalaano mereerinni 14 daddalaano shallagote buuxo assinanni hee’noonnitano qummeessinohu kalaa Isheetu; deerru giddo afantanno daddalaanowa konni albaanni shallagote buuxo assine iillinoonniha hafanfarino woxeno 844 kume 678 birranna 75 saantime qolsiinsoonnita egensiisino.
Woradunniti eote bu’ano daddalu tirfenni, Vaatetenni maazzagaajju minnanna baattote Liizenni hattono babbaxxitino gibrinnu laalchubbanni afi’nannita ikkaseno xawisino.
Ganyete ikko maazzagaajju minna eo widoonni gamba assa hasiissannota gattino yanna giddo mucci assine gamba assate addi illachinni loonsanni hee’noonnitano kulino.
Amsaalu Felleqe
Bakkalcho Dotteessa 17, 2016 M.D
