Addis Ababa:- Qoqqowoho loosantannota duuchu handaari loossa Federaalete mootimma illacha tugge harunsanna irkisa, loossa gumaamimmatenni jeefisate jawa kakkaooshshenna jawaante kalaqqannota Sidaamu qoqqowi pirezidaantichi Desta Ledamo coyi’ri.
Federaalete Loosunna Dandoote ministere irkotenna harunsote gaamo qoqqowoho Loosu dandootenna Interprayzootu latishshi handaarinni sa’u honse agannara loosantino loossa tenne lamalara keeno harissino.
Ministerete irkotenna harunsote gaamo qoqqowoho handaaru loossa keeno assitu yannara Pirezidaantichu Desta Ledamo coyi’ranni; qoqqowinkera loosantanno duuchu handaari loossa Federaalete motimma illacha tugge irkonna harunso assa loossa roorenkanni gumaamimmatenni gumulate jawa kakkaooshshenna jawaante kalaqanno yiino.
Qoqqowu Loosunna dandoote Biiro widoonni loosantanni afantanno loossa gummaamma ikkitinota kaysinohu Pirezidaantichu Desta; qoqqowoho baxxinohunni dandoo kaima assinno loosu kaayyo kalaqo loosu aana hosiisa dandiinoonnita xawisino.
Qoqqowu Loosu Dandootenna Interprayzootu Latishshi Biiro Sooreette dukko Hageretsiyoon Abbebe ise widoonni; amandoonni baajeettete dirinni qoqqowoho loosu, dandootenna Interpirayzootu latishshi handaarinni sa’u honse agannara looso mixote garinni gumula dandiinoonnita kayissino.
Sooreette,Ministerete harunsotenna irkote gaamo miillano keenote yannara kayissino hedonni; qansootaho loosu kaayyo kalaqo quchummate luphi yite leelturono, baadiyyete kayinni sa’e sa’e foonqe leeltannota qummeessitino.
Handaarunni leeltino xe’ne taashshateno hasiissannota yannitte hayyo horonsi’ne taaltanno gede assa hasiissannota qaagiissitino.
Gaamo handaaru loossa beronni hanaffe onte barrubbara olluubbate geeshsha dirrite harunsonna irko assitannota kulloonni.
Loossa yanna agarre harunsanna irkisa handaarunni xaaddara dandiitanno mitiimma balanxe tiratenna Federaalete mootimma ledono qinaambe loosate harinsho kaajjishshannota ikkaseno xawinsoonni.
Gaazeexu Odeessaanchinni
Bakkalcho Dotteessa 17, 2016 M.D
