Addis Ababa:- Itophiya miinju irkiraanchimmanni fushshatenni wolaphose wo`ma assate jawaata hasiissanno yee xaphoomu ministirchi Abiy Ahimed (D/r) xawisi.
Soorrote mootimma irkissanno dagittete bare xaphoomu ministirchi Abiy Ahimed (D/r) afaminowa sa`i qidaamete barra Guraagete zoonera Wolqixxe quchumira hadhino.
Xaphoomu ministirchi yannate saysino sokkanni coyi`rino garinni; Itophiyu wolaphosera sharrantinonna kadote gashshootinni galtinokki gobba ikkiturono; miinju irki’raanchimmanni fushshatenni wolaphose wo`ma assate jawaata hasiissanno.
Guraage “Gogot” yinanni sheemaatinni mittimmate daafira rosiisinonna assootunni hee`rino dagoomaati yiinohu xaphoomu ministirchi; Guraage keeru daafira rosiissannonna keerunni heedhanno lawishsha ikkitino dagaati yiino.
Itophiya babbadatenna gaance kalaqate woxensa, egennonsanna yannansa aatenni barru baala wo`naaltannori noota coyi`re; Guraage “mittimma wolqate” yite ammantanno. Konninnino Itophiyu daga rosicho adha hasiissannota qummeessino.
Keeru daafira hendummokkiinni, h e e ` n u m m o k k i i n n i n n a hasaambummokkiinni keere dirrisa didandiineemmo yiinohu xaphoomu ministirchi; Itophiyu daga keere batisse hasi’ra, mittimmatenni hee’ratenni jiroo`mitinonna baalunkura injitanno gobba la“ate loonsammora hasiisanno yiino.
Itophiyu baasa hige horraanote wo`naalsha qeeltinonna kadote gashshootinni galtinokki gobba ikkase qummeesse; ikkollana miinju wolaphose buuxxukkiinni keeshshitinota kaysino.
Guraagete daga daddalu handaarinni leellishshino gumino Itophiya miinju irki’raanchimmanni fushshate lawishsha ikkinota xawise; baalanti Itophiyu daga latishshahonna jireenyaho sharrama nooseta buuxisino.
Itophiyu daga baca ayimmate xawishshi nooseta adha hasiissannoseta buuxise; budu, afuu, qooxeessu baattote ofollo badooshshi gobba billaallisannoha ikka noosikkiita xawisino.
Guraage keeru daafira rosiissannotanna keerunni heedhanno keere sayissanno daga ikkase xawisatenni; baxxinohunnino giddose babbaxxitino ayimma heedhuserono; Guraagimmatenni mitto ikkite hee’ratenni Itophiyu mittimma lawishshanna malaate ikkite heedhinota coyi`rino.
Huucci`ratenni fulate, suuqo lossate, daddalo halashshate mittimmatenni jawaata qara ikkitinota xawisnohu xaphoomu ministirchi; jawaata Guraagete daga Itophiyu mittimmase agarte jiroo`mitanno yitanno kaajjado uurrinsha amadde mootimmate qotira uurra hasiissanno yiino.
Itophiyu jiroo`mitannohu kaajjadu wo`naalshinni ikkinota xawise; gobba babbadatenna gaance kalaqate wo`naaltanno wolquwa haaqee dunneessate mittimma kaajjisha qara ikkitinota xawisino.
Itophiya kaajjadu wo`naalshinni jireenyu gottimmara iillishatenni Afrika wolaphotenna jireenyu lawishsha assate jawaante doodhinoommo yiinohu xaphoomu ministirchi Abiy (D/r) baalanti Itophiyu dagano tenne gobboomitte yawora gutunni uurra noonsata sokkasi sayisino.
Abbebech Maatewoos
Bakkalcho Dotteessa 17, 2016 M.D
