Dhaggete hiiqqamme gobboomitte amaalamme,reekkote farconna haroonsatenni sissa hasiissannota gobboomu hobbaatu amaale mini egensiisi.
Amaalete mini yannannita gobboomitte hobbaatunna ga’labbote hajubba lainohunni beroo barra uyitino xawishshinni;hundi polotiku qarra gobboomu amaalammenni,muliha polotiku qarra kayinni reekkote farconninna haaroo’matenni taashsha hasiissannota egensiissino.
Itophiyaho mitte mootimma doorshunni qeelte biilloonya amaddurono;callise muro sayisa hasiissannokki gobboomittenna beeqqisiissanno amaalama hasidhanno hajubba hee’ransanni;konne bilchaatissanno mereersitino gobboomitte Amaalammete komishiine uurriteenna loosoho e’noonni yiinohu xawishshu;Komishiine 10 qoqqowubbaranna lamu quchummate gashshoottara woradda woraddatenni amaalammete harinshora beeqqitannore badate looso jeefinsoonniha ikkanna;679 woradda, 12 kumi 294 beeqqaano bandoonnita xawishshu buuxisino.
Amaalamme, hajote annuwa ikkitino daga mereersitinoha ikkanna;hasaawu ummanna malu hedubba aana alinni eelaagge ikkikkinni; eela dagate giddonni burqiteenna,hasaawunni bowirsine mereerira abbinanni hayyo nootano amaalete mini xawishshi buuxisino. Shiima lamala giddono komishiine qoqqowubbate deerrinni assinanni amaalammete bare harisatenni hanaffannotanna beeqqaano badate harinsho assinoonnikki qoqqowubbara beeqqaano bandannita qummeessino.
Tenne ilamate mereero mitte hinge afi’nanni kaayyo hedessi assinikkinni,irkisatenninna taashshatenni Itophiyaho hundi qarrubbara mala kalaqate duuchunku qeechasi fulanno gedeno gobboomu hobbaatu amaale mini fushshino xawishshi egensiisino.
Reekkote farco lainohunnino,Itophiyu giddo addi addi dhaggete hedeweelchonni koma,shettonna sofote qoosso kado kalaqantino. Techo geeshshano wolqatenni qeelaancho ikkatenni biilloonya amaddino bissa,wolootta gawajjitannorenna hunaano asse bushiisha suffannote. Komatenna rabbate handuluulle,miicamaanchimma tenna caccaawate odeessishshi gobbate qara polotiku gano gannanni xawishsha ikkinotano xawishshu buuxisino.
K o n n e h u n a a n c h i m m a n n a miicamaanchimmate handuluulle tayisate farco mitto doorsha ikkasenni,reekkote farco harinsho massagantanno poolise hanqafo kaajjitino yiinohu xawishshu; poolisete hanqafo qara mixo reekkote farco harinsho massanganninna gumulsinanni amanyoote diriirsatenni sufino keere,araara,seeru aliidimma,farconna dimokiraase buuxisiisa ikkinota xawishshu qummeessino.
Tini mixo gafa gantanno gede hasiisanno garinni jaddo buuxanna ku’laato,halaale hasa,araara,balaxote ikkito aana safantino maaro,riqiwonna uurrinshaame woyyeesso reekkote farco hayyo gede assatenni;gobbankera loosu aana hosiinsannitano qummeessino xawishshu.
Mitu mitu qooxeessira leellanno kakkachuullu polotiku laooshshe,tantanantino jaddotenna mulq’rate hasatto qorqorate; mootimma seera ayirrisiisate uurrinshuwa woyyeessatenni;tantanonsanna dagatenni ledo noonsa xaadooshshe kaajjishshanno gede hala’lado loossa loossanni no. Konninnino Addis Ababahonna wolootta gobbate jajjabba quchummara addi addi cancishate gawajjo iillishate mixidhe millissanno wolquwa mixo diiga dandiinonni. Yiino xawishshu.
Aanteteno polotiku kuula buudhatenni tantanantino mu’qi’ratenna jaddote gaamo hasiisanno bikini qorqorre seeru qaafo adhate kaajjadonna gummaamo seera agarsiisatenna ga’labbote tantano heedhannonke gede assa hasiissinohura;daga seeru agarsiisaanonni ledo halamatenni seeru aliidimma ayirrisiisa hasiissannota xawishshu buuxisino.
Yaareed Geetaachew
Bakkalcho Dotteessa 17 , 2016 M.D
