- Latishshu mixo jeefora 9 Miliyoone doolaare geeshsha afi’rate hendoonni
Addis Ababa:- Gobbayidinni eannoha laashshate ikkanno uduunne gobba giddo laashshate dandiinanni dhuki kalaqamanni noota Industirete ministere egensiissu.
Tonnu diri latishshu mixo jeefora 9 Miliyoone doolaare geeshsha afi’rate hendoonnitano kulloonni. Maashinna laashshitanno Industirra kaayyo, hekkonna aanino gutu loosi aana maashshinnate laashshaanonna hajo la’annonsa bissa ledo hasaawu bare harinsoonni.
Industirete ministirchi kalaa Melaaku Allebel barete aana coyi’ranni; gobbayidinni e’anni keeshshitino maashinnanna laashshate ikkanno uduunne gobbate giddo laashshate dandiisiisanno dhuki kalaqamanni afamanno yiino.
Laashshate handaari latishshi miinju aana tantanote reekko abbatenni rakkino lopho borreessiisate kaa’lanno yiinohu kalaa Melaaku; gobbate giddo laashshaanora hexxo tugannohu laashshate dhuki kalaqamanni afamanno yiino.
Laashshate handaari lopho abbate mootimmate deerrinni Istiraateejenna wodho gumulantanni afantannota qummeesse; maashinnate wodho, gogu Industire lendanna eote laalcho riqiwanna dhuku gatamarshi Istiraateeje qixxaabbe loosu giddora e’inota xawisino.
Gobbanniti tonnu diri latishshu mixonni gobbaydi dikkora sonkanni laalcho lossate loonsanni hee’noonnita xawisinohu kalaa Melaaku; laashshate handaarinni tonnu diri latishshu mixo jeefora 9 Miliyoone doolaare geeshsha afi’rate hendoonni yiino.
Handaaraho 5 Miliyoone ikkanno qansootira loosu kaayyo kalaqate hendoonnita qummeesse; eote laalcho riqiwate xibbuunni 30% nooha dikkote qeecha 60% widira lossate loonsanni hee’noonnita xawisino. Laashshate dhuka horonsirate bikka 85% widira lossate mixo amandoonnita xawise; latishshu mixonni haaruudde Interpirayizoota uurrisate amandoonnita buuxisino.
Laashshate handaari latishsha waaga lendoonni laalcho laashshine rakkinotanna sufo noo lopho borreessantanno gede assannoha ikkasi xawisatenni miinju tantano reekko abbatenna loosu kaayyo kalaqatenni luphiima qeecha afi’rinota qummeessino.
Gobbate giddo laashshate ikkanno uduunne horonsira laashshaanote dikko kalaqqannota ikkase xawisinohu Ministirchu; Industirete eo ikkitanno maashinna laalcho lossatenni miinju lopho aana eewaancho qeecha fultanno yiino.
Itophiyu Interpirayize qaru dayirekterchi Allebbaachewu Nuguse (Dr.) isi widoonni; maashinna laashshitannoreno laashshaano Interpirayizooti ledo taalo irkisatenni handaaru latishsha loosa hasiissanno yiino.
Sa’u Onte dirra giddo 32 kume ali maashinna laashshaano Interpirayizooti liqoote womaashshira sayinsoonni yiinohu dayirekterchu; gobbayidinni e’anno maashinna gobbate giddo riqiwatenni harinshotenni laashshate dhuka gumulsate dandiisiisanno yaanni coyi’rino.
Laashshaano Industire handaara irkisate sa’u dirra giddo haammata millimillo assinoonnita qummeesse; baxxinohunni, gobboomu latisate hasatto wonshate egennonna loosu aana illachishshino millimillo gumullanni afammannita kayisino.
Sa’u onte dirra giddo 15 kume ali haaruudde laashshaano shiimaaddanna manaadda Interpirayizoota kalaqa dandiinoonni yiinohu dayirekterchu; 16 Miliyoone birri ali liqoonni horonsiraano assate dandiinoonnita kulino.
Laashshaano loosu base afidhannonna safote latishshi owaante wo’mitannonsa gede assinoonnita qummeesse; Industirete Ekistenshiine owaante afidhanno gedenna gobbate giddonna gobbayidi gobbuwa dikkote kaayyo horonsiraano ikkitanno gede assinoonnita huwachishino.
Qiddist Gezzaheny
Bakkalcho Dotteessa 10 / 2016 Hamuse
