Addis Ababa:– Gobbate sagalete wowe buuxisate sagalete amanyootenna taaltino sagale reekko mixo qixxeessine loosu giddora e’noonnita Gibrinnu ministere egensiissu. Ministere sase Istiraateejeno faajje assitino.
Gibrinnu ministere qoqqowu gibrinnunna saadate jiro latishshi biiro hattono halamaano bissa ledo halamatenni sagalete hobbaatenna isilanchimma balaxote gibrinnu laalchi Istiraateejera, gobboomu iillino laalchi amadooshshi Istiraateeje; sagalete amanyooti aana illachishino sagalete amanyooti Istiraateeje yaamantinore sase Istiraateeje faajje assitino.
Gibrinnu ministirchi Girma Amente (Dr.) Istiraateeje faajje assini yannara coyi’ranni; gobbate sagalete wowe buuxisate sagalete amanyootinna taaltino sagale reekko mixo qixxeessine loosu giddora e’noonni. Tini mixo gatunni hurbaatu geeshsha noo siiwo kaima assatenni sagalete amanyootinna taaltino sagale hajubba gummaame ikkitanno gede assitannote.
Sagale laashsha mitte qara hajo ikkiturono laalcho batinyunninna isilanchimmatenni laashsha hattono hafanfarre ajishatenni sagalete hobbaatenna wowe buuxisiisa hasiissanno yiinohu Ministirchu; faajje assinoonni Istiraateejuwa Itophiyunnita sagalete amanyootenna reekko lifixisate luphiimu qeechi hee’rannonsa yiino.
Tenne wodanchatenni hajo la’annonsa bissa Istiraateejuwate gumulamara uminsa qeecha fula hasiissannonsata xawisinohu Ministirchu; sagaletenna sagalete amanyoote xeisate qarri gobbate dagoomittetenna miinju qarra ikke keeshshino. Muli dirra kawa Ministerete loosu mini ‘’Laashshate aleenni’’ yaanno adawarshinni sagaletenna sagalete amanyooti mixo kalaqe gumulanni keeshshinota xawisino.
Mootimma laalchonna laalchimma ledatenna sagaletenni umo dandaate assitino sharronni ikkado guma borreessiisa dandiinoonnitano kulino.
Gibrinnu ministere sagaletenna sagalete amanyooti borro mini sooreette dukko Alemtsehay Sirgaawi ise widoonni; Istiraateejuwa gibrinnu handaarinni laashshinanni laalcho dagoomunniwa iillanno woyte hobbaatinsanna isilanchimmansa agarantinota hattono laalchu hafanfarannokki gede assitanno yitino.
Kunino gibrinnu handaarinni sagalete shiilonni jiroo’mitinoti, qinaabbinotinna ikkado sagalete shiqqo, iillonna horonsiraanchimma heedhanno gede dandiisiisanno yitinoti Sooreette; hajote bidhattora malu hedo aana huwanyo kalaqate looso loosa hasiissannota xawissino.
Konni gobbaanni sagalete amanyooti aana illachishshinore gibrinnu latishshi loossa gumulatenna injoo kalaqatenni horote aana hossanno gede assa hasiissannota coyidhino. Kunino sagalete wowe buuxisate widoonni hee’ranno qeechi luphiima ikkasi egensiissino.
Qiddist Gezzaheny
Bakkalcho Dotteessa 10 / 2016 Hamuse
