Addis Ababa:- Sidaamu qoqqowira Federaale baajeette gaanteenna loosantanni noo dooggate latishshi mereerinni 71.5 k.m Daayye- Arooreessu-Hookko doogga ijaarshi jeefishshi xibbuunni 80% ale iillinota IFDR Dagate Riqiwaano Amaale Mini Uurrinshu Komite xawissu.
IFDR Dagate Riqiwaano Amaale Mini Uurrinshu Komite Sidaami qoqqowi giddo Federaalete baajeettenni loosantanni noo dooggate latishshi loossa tenne lamalara towaanyo assitino.
IFDR Dagate Riqiwaano Amaale Mini quchumu safote latishshi uurrinshu komite miila ikkitinoti Baabbba Shewwiit Shankitinna ledose miilla Tuulatenni Woraanchu; Daayyenni Arooreesa saeno Hookkote hattono Daayyenni Cirrete geeshsha loosantino doogga towaanyo assitino.
Towaanyote yannara Harbagoonu woradi teessaano ledo hasaawa assitinoha ikkanna; qarqaru dagoomi doogote injo ledo amadisiisante xaaddannonsa mitiimma hala’ladunni odeessidhino.
Soorrote mootimma kawa doogote latishshi widoonni qoqqowu deerrinni jawa soorro dagginota xawissinori teessaano; ikkirono xaa geeshsha mito mitowa qara doogga giddonni mitte ikkitinoti Tuulate-Woraanchu doogo qarri tidhama hoogasinni lowo qarri xaadanni noohura doogo rahotenni ijaarante gooffeenna horoonsi’neemmo gede illacha tunge loonsonke yite woxarattonsa sayissino.
Federaale baajeette gaanteenna loosantanni afantanno Tuulatenni Woraanchu, Daayyenni Arooreesa- Hookkote hattono Daayyenni-Cirre sasenta jajjabba doogga ijaarsha laisse Baabba Shewwiit Shankiti; yinoonni yannanni gumulama hoogansa korkaata hajo la’anno bissa ledo hasaambe gattino harancho yanna giddo jeeffe horo uyitanno gede assinannita buuxissino.
Sasente doogga mereerinni 71.5km ikkitannoti Daayye- Arooreessu- Hookko doogga ijaarshi jeefishshi xibbuunni 80% ale iillinotano towaanyonsanni buuxxinota xawissino.
Tuulatenni-Woraanchu geeshsha ijaarsinanni hee’noonni doogo babbaxxino korinni xaa geeshsha jeefa hoogase xawisse; aantete kaajjado harunsonna qorqorsha assineenna mulenni gooffanno gede assinannita towaanyote yannara xawinsoonni.
Gaazeexxu Odeessaanchinni
Bakkalcho Dotteessa 10 / 2016 Hamuse
