– Itophiyaho 10 miliyoone hekitaare baatto gorsunni lattara dandiitanno
Addis Ababa:- Sa`u honse aganna giddo 100 kume hekitaare baatto gorsu latishshira qixxeessa dandiinoonnita Gorsunna gammoojjittete qooxeessi ministere egensiissu.
Gorsunna gammoojjittete qooxeessi ministere dagate xaadooshshinna komunikeeshiine loosu gumulsiisaanchi kalaa Bizuneh Tolcha Itophiyu pireesete uurrinshara xawisino garinni; 2016 baajeetete dirinni gobbate giddo baalante qooxeessubbara 391 kume hekitaare baatto gorsu latishshira qixxeessate mixo amande loonsanni hee’noonni.
Kalaa Bizunehi xawishshi garinni; baalante qoqqowubbara mereerimanna manaadda gorsu latishshi pirojekitubba aana Ministerete loosu mini harunso assanni afamanno. Assinoonni irkotenna harunsote loosinnino sa`u honse aganna giddo baalante qooxeessubbara 100 kume hekitaare baatto gorsu latishshira qixxeessa dandiinoonniha ikkanna; darga latisatenna wixa wixate loosi Gibirinnu ministerenni gumulamannoho.
Federaaletenninna qoqqowubbatenni jeefisamate aana noo haammata pirojekitubba hee`ransanni batinye guma borreessiisa dandiinannihu baajeetete diri xaphishshi aana ikkannota xawisinohu kalaa Bizunehi; sa`u dirrara kalqete baanke irkonni gumulantino xiinxallubbanni Itophiyaho 10 miliyoone hekitaare iillitanno baatto gorsunni lata dandiitanno gede buunxoonnita egensiisino.
Konninnino sa`u sase dirranna bocu yanna giddo xaphooma gobbate gorsu safote latishshi ijaarshinni 1.6 miliyoone ali hekitaare baatto latisate qixxeessa dandiinoonni yiino.
Kalaa Bizuneh coyi`rino garinni; Ministerete loosu mini 28 gorsu safote latishshi ijaarshi pirojekitubba gumulanni nooha ikkanna; amandoonni baajeetete dirinni 12 pirojekitubba gama jeefisatenni 29 kume ali hekitaare baatto gorsu latishshira qixxeessate mixo amande loonsanni hee`noonni.
Sa’u sase dirranna bocu yanna giddo 1.3 miliyoone ali hekitaare baatto xiinxallotenna diizayinete looso loonse gorsu latishshi pirojekitubbara qixxaawa assa dandiinoonnita buuxise; baajeete afi`niro ijaarshu gumulamannota xawisino.
Amandoonni baajeetete dirinni baalante qooxeessubbara 353 kume 630 hekitaare baatto xiinxallonna diizayine loosatenni gorsu latishshira qixxaawa assate mixo amande loonsanni afammannitanna xaa geeshsha noo gumulshinni 70 kume hekitaare ali baatto xiinxallotenna diizayinete looso loosatenni gorsu latishshira qixxaawa assa dandiinoonnitano kalaa Bizuneh coyi’rino.
Xaa yannara 25 gorsu latishshi pirojekitubba xiinxallotenna diizayinete loosi gumulamanni noota xawisinohu kalaa Bizunehi; kuri mereerinni Ereri, Lokka Abbaayyu, Wodiidi Gode, Eeliidi Gannaalenna woloottano baajeetete diri goofimarchi geeshsha jeeffannota huwachishino.
Abbebech Maatewoos
Bakkalcho Dotteessa 10 / 2016 Hamuse
