Addis Ababa:– Qoqqowoho sai rosu dirinni borreessiinsoonniha 12ki kifile woffi yinoha gobboomu fonqoli guma woyyeessate rosaano qixxeessate looso loonsanni hee`noonnita Sidaamu qoqqowi Rosu Biiro egensiissu.
Qoqqowu Rosu Biiro Layinki Sooreessi kalaa Taaffese Gebiremaariyam Itophiyu pireesete uurrinshara xawisino garinni; qoqqowoho sai rosu dirinni borreessiinsoonniha 12ki kifile gobboomu fonqoli guma woyyeessate rosaanote guwuurshu roso aatenna irkisate loossa loosantanni no.
Kalaa Taaffese xawishshi garinni; qoqqowoho afantanno baalante rosu minnara guwuurshu rosi amanyoote diriirsatenni rosaano ikkadda assate looso loonsanni afammanni.
Biirote luphiima massagaano, rosiisaanonna rosaanote maate afantinowa rosaanote guma lainohunni hasaawa assinoonnita xawise; gumu woyyaamberanna noo xe’ne wonshate kaa`litanno loossa loosate raga worre loosu giddora e`noonnino yiino.
Gobboomunna qoqqowu deerrinni uynanni fonqolo adhitanno rosaanora baxxino illacha uynoonnita buuxisinohu kalaa Taaffese; rosaano sai dirinni woyyino guma abbitanno gede kaajjado harunso assinanni afammanni yiino.
Borreessaminoha woffi yino guma woyyeessate rosiisaano fooliishshonsa yanna horonsidhe rosaano qixxeessate loossanni afantannota egensiisino.
12ki kifile gobboomu fonqolo adhitanno rosaano borreessamme baalante zoonnara harinsanni hee`noonnita buuxisinohu Sooreessu; borreessammete harinsho mixote garinni danchu deerrira afantannota coyi’rino.
Tayxe rosu dirinni qoqqowoho 36 kume rosaano fonqolo adhitannotano kalaa Taaffeese xawisino.
Rosaano fonqolo qooxeessinsara adhituro xaaddansara dandiitannota tiiu hekko ajishanna ge’e fonqolama dandiisiisannonsatano huwachishino.
Biiro sai dirira 54 kume rosaano fonqolsiissa dandiitinota coyi’re; kuri mereerinni xibbuunni 1.99% ikkitanno rosaano calla luphiima rosu uurrinshuwa e’inota qummeessino.
Rosu loosi gumaamo ikkanno gede rosaanonna maatensa illacha aa hasiissanno yiinohu Sooreessu; rosaanote guma saeno rosu amanyoote woyyeessate baalunku qansichi qeechasi fula hasiissannotano xawisino.
Abbebech Maatewoos
Bakkalcho Dotteessa 10 / 2016 Hamuse
