Addis Ababa:- Sidaamu qoqqowira bunu latishsha halashshate 28 Miliyoone ale woyyaabbino bunu chigginyuwa kaashshoho qixxaabbinota Qoqqowu Irshunna Kalaqamu Jiro Latishshi B i i r o egensiissu.
Ledoteno, 2.9 Miliyoone Abukaadote chigginyuwa qixxeessinoonnita Biiro xawissino.
Qoqqowu 2016 baajeetete dirinni bununna gummate laalo chigginye kaashshi looso Shabbadiini woradira hananfoonniha ikkanna; Biirote sooreessi kalaa Memmiru ‘ Moke tenne yannara coyi’ranni; qoqqowoho bunu laalchimma isilanchimmatenni latisate woyyaawino bunu sirchira illacha tungoonni.
Qoqqowoho xaa geeshsha 165 kume hektaare baatto bunu kaashshinni diwantinota qummeesse; bunu latishsha halashshate tayxe diro 10 kume haktaare ali baatto aana bunu chigginye kaansannita xawisino. Konnirano, 28 Miliyoone ale bunu kaashsho qixxeessinoonnita egensiisino.
Bunu kaashshira qoteho akkalino buna buqqisatenna mukkate loosono illacha tunge gumullanni yiino.
Ledoteno, harinsanni hee’noonni latishsha halashshate tayxe diro 2.9 Miliyoone Abukaadote chigginyuwa qixxaabbinota xawisino.
Konninnino 4 kumenna 500 hektaare haaro baatto latinsannita qummeesse; gummate laalo chigginyuwa kaashsho haanju harumi mixo ledo qineessine gumullannitano huwachishino.
Qoqqowu Bunu, Gummate Laalonna Makimaanote Biilloonyi qaru dayirekterchi kalaa Mesfin Qarre isi widoonni; qoqqowoho mitte hektaarenni afi’nanniha 9.5 kuntaala bunu laalcho 11.5 hektaare widira lossate hendoonnita xawisino.
Konnirano bunu laalchonna laalchimma lossitanno paakeeje wo’munni wo’ma gumulate loosidhe galtinori ogeeyyetenna massagaanote huwanyo lossatenni qinaawote looso loonsanni hee’noonnita coyi’rino.
Bunu laalchimma ledate kalaqamu harishsha qixxeessatenni kalaqamu buna kalqete dikkora shiqishatenna loosidhe latinori eo lossate illacha tungoonnita qummeesse; konnirano 3.2 Toone kalaqamu harishsha qixxeessinoonnita xawisino.
Shabbadiini woradi qaru gashshaanchi kalaa Eeliyas Ayyele tenne yannara coyi’ranni; woradaho 10 kume 250 Hektaare ali baatto bunu latishshinni diwantinota kule; tayxe bunu iillo halashshate 527 hektaare baatto aana haaro bunu kaashsho gumullannitanna 1 Miliyoone ale woyyaawino sirchi bunu chigginye qixxaabbinota coyi’rino.
Qoqqowoho bununna gummate laalo kaashsho Shabbadiini woradira babbaxxitino olluubbara hananfoonniha ikkanna; hanafote aana mootimmate loosu sooreeyye, ogeeyyenna woloottu hajo la’annonsa bissa leeltino.
Qiddist Gezzaheny
Bakkalcho Dotteessa 10 / 2016 Hamuse
