Addis Ababa:- Xaphoomu ministirchi Abiy Ahimed (D/r) Ruwaandaho Kiigaalira assino faajjete keeshsho lamente gobbuwa xaadooshshe roorenkanni kaajjishshannota ikkase xaphoomu ministirchi borro mini pirees sekiretariyatete sooreette Biillene Siyyumiti xawissu.
Sooreette xaphoomu ministirchi Abiy Ahimed (D/r) Ruwaandaho Kiigaalira assinoti faajjete towaanyo lainohunni uytino xawishshinni coyidhino garinni; xaphoomu ministirchi liuukaanesi gaamo ledo assino keeshsho lamente gobbuwa xaadooshshe roorenkanni kaajjishshanno assootubba gumulantinote.
Xaphoomu ministirchi Abiy Ahimed (D/r) Kiigaali faajjete towaanyosi lame illachubba nooseta xawisse; umi illachi Ruwaandu pirezidaantichi Pol Kagame ledo gummaamo loomoomu hasaawa harinsoonniho. Layinki illachi qole Kiwibuku 30ki diri qaaggo aana afamatenni Itophiyu Ruwaandu daga ledo mitteenni uurrase leellishshinoha ikkasi buuxissino.
Xaphoomu ministirchi Abiy faajjete towaanyosi hanafinnoti Ruwaandu gibirinnu agarooshshi inistitiyute dancha rosicho adhinoonnita ikkase buuxxisse; inistitiyute Itophiyu ledo shiqqanno saadate ce“onna gibirinnu pirojekite gumullannite.
Wole xaphoomu ministirchi Ruwaandu dagoomitte mootimmate mine pirezidaantichu Pol Kagami ledo gumaamo lamoomu hasaawa harisinota xawissino.
Hasaawinsannino Itophiyunna Ruwaandu gibirinnu handaarinni borreessiissinoha gumaamo wo`naalsha Soojjaatu Afrikinna gobbuwate deerrinni beeqqisate illachishshinota egensiissino.
Xaphoomu ministirchi liukaaneno Ruwaandu sooreeyye ledo gobboomitte horo noonsa lamoomu keeshsho assitinota qummeessite; konninnino gobbayidi hajo ministirchi Ambaasaadder Taayye Atsiqesillaasehu massagaanchimmanni Ruwaandu mootimma Itophiyu embaase ijaarshira 7 kume 771 kaare meetire baatto Kigaali quchumira baraarsinoonni. Kunino lamente gobbuwaha istiraateejikete halama buuxisinohonna roore gottimmara massanno assoote ikkasi huwachishshino.
Aantanno boode dirra giddo embaasete ijaarshi jeefisame faajjetenni loosu giddora e“annotano buuxissino.
Gobbuwanniha lamoomu xaadooshshe kaajjishanno roduuwu quchumma sumuumme Addis Ababu quchumi kantiiwa Adaanech Abeebe Kigaali quchumi kantiiwi ledo malaatissino.
Sumuummeno haanju latishshinni, ikko turizimetenni, moolunna daadaanchu ishine hunnanni loossa aana rosicho adhatenna gutunni loosate dandiisannoha ikkasi xawissino.
Ruwaandaho gumulaminoha sircho raafatunni hunate 30ki diro qaaggo aana hasaawa assinohu Ruwaandu pirezidaantichi Pol Kagami xawisino garinni; Ruwaanda yannate iillitinosi qarrinni woxxate haammatu Afriku gobbuwa kaa`lo assitino. Konni ragaanni Itophiyu mootimmano galatino.
Xaphoomu ministirchi Abiy Ahimed (D/r) wedellimmasi yannanni keeru agarsiisaancho ikkatenni Ruwaanda qarrunni woxxate kaa`lo assinotano xawisino.
Abbebech Maatewoos
Bakkalcho Dotteessa 3, 2016 M.D
