Yirgaalame:- Gobbate latishsha buuxisiisatenna baincho assoote gargarate ragaanni tuqu xaadooshshuwa luphiima qeecha afidhinota Sidaamu qoqqowi Amanyootunna Tsere mussinnu komishiine komishiinere Zelaalem Lemma coyidhu.
Komishiine, mooranna baincho assoote gargarate miidiyu halamme hasiissannota kaima assatenni; “Miidiya danchu amanyooti horoonshira” yaanno adawarshinni qoqqowohonna qooxeessaho afantanno tuqu xaadooshshuwanna dagate xaadooshshi uurrinshuwa sooreeyyenna ogeeyye ledo hasaawu bare Yirgaalamete quchumira bero harissino.
Barete hasaawa assitinoti Qoqqowu Amanyootunna Tsere-mussinnu komishiine komishiinere dukko Zelaalem Lemma coyidhanni; xaa yannara gobboomu deerrinni ikko kalqete mussinnunna bainchu assootubba hala’litanni daggino.
Dagatenna gobbate latishshira dancha gashshoote halashshate loossara jawa guffa ikkitinore mooranna baincho assootubba reeqecceessatenna dagoomaho huwanyoote kalaqate ragaanni kayinni miidiyubba garunni horoonsi’ra agarrannita coyidhino.
Sa’u muli dirra kawa qoqqowohonna qooxeessaho afantanno tuqu xaadooshshuwa ledo qinaambe loosa hananfi kawa woyyaambe dagginoha ikkirono; mussinnanna moora ciiggishate ragaanni albillichono jawu mini loosi agarannota huwachishshino.
Buunxoonnikki sokka dagate maccara iillituro dagate mereero ikko dagatenna mootimmate mereero huluullonna co’ichu xaadooshshi hee’rannokki gede assanno daafira tuqu xaadooshshuwa amanyootunni quxantinore ikka noonsatano qummeessitino.
Qoqqowu giddo loosantannota latishshunna danchu gashshooti loossa garunni egensiisatenna; dancha amanyoote bowirsatenni soorro abbateno tuqu xaadooshshuwa ledo hasaawate harinsoonni bare jawa qeecha afidhinota kayissino.
Jireenyu paarte Sidaamu qoqqowi sini poletiku tantano handaari sooreessinna Sidaamu Biroodkaaste Korpreete (SBC) boordete gambisaancho ikkinohu kalaa Ashshennaafi Eeliyaasi barru wosincho ikke barete leelle assino hasaawinni; miidiyu dagatenna gobbate latishshinna lophora noosi qeechi luphiimaho yiino.
“Miidiyu danchu amanyootinni quxamiro gobba gatamaranno; amanyootu ba’ne noosihu kayinni gobba diiganno” yaannino kalaa Ashshennaafi coyi’rino.
Meessiha dancha rosichonna noonketa latatenna lophate injoo woloottaho rosiisatenna, woloottuwiinnino dancha lawishsha adhate miidiyu kaajjado wolqaati yiinohu kalaa Ashshennaafi; konnira, amanyootu noosihanna gobbate lophora sharramanno gede amanyootunni massaga hasiissannota coyi’rino.
Miidiyubba dagate mereero ikko dagatenna mootimmate mereero ammanamanna kaajjadu xaadooshshi kalaqamanno gede assitannota kayse; konnirano lawishshu gede Iisiyunna Laatiin Ameeriku gobbuwa tuqu xaadooshshuwansa amanyootunni massagantanno assatenni dagansanna gobbansa lopho buuxisiisidhinota coyi’rino.
Mooru hala’lanna dagate latishsha buuxisiisa didandiinanni yiinohu barru wosinchi; dagate horonna jiro riiccanno bissa reqecceessatenni xa’mamaanchimmanna seeru aliidimma buuxisiisantanno gede assateno miidiyubba amanyootu noonsare ikkitara agarrannita huwachishino.
Barete beeqqaano ikkitinori tuqu xaadooshshuwanna dagate xaadooshshi uurrinshuwa massagaanonna ogeeyyeno xaa geeshsha handaarunni loosantino loossara ledotenni albillichono amanyootunni quxamatenni mooranna baincho assoote gargarate dandiinanni garinni dagate halaalaancho mashalaqqe iillishatenna dagatenna gobbate lopho buuxisiisantanno garinni loosate murcidhinore ikkansa coyidhino.
Amsaalu Felleqe
Bakkalcho Dotteessa 3, 2016 M.D
