Addis Ababa:- Saynsummohu Ramadaanu agani baca qarramaano kaa`linoommo, mimmito irkinsoommonna Itophiyu daganna dagoomi mittimmansa kaajjillunni leellishshino aganaati yee xaphoomu ministirchi Abiy Ahimed (D/r) xawisi.
Xaphoomu ministirchi Abiy Ahimed (D/r) 1445ki Iid Alfexiri ayyaana lainohunni sayisino hawalle iillishi`ne sokkanni; konni dirinni saynsoommohu ramadaanu agani keeraawinoha, baca qarramaano kaa`linoommo, mimmito irkinsoommo, babbaxxitino amma`no noonsa Itophiyu daga dagoomittete mittimmansa kaajjillunni leellishshino aganaati yiino.
Doogonkera caabbichu malaatta xaaddannonke qarrubba mittimmatenni ikkine sa`nammora dandiineemmota huwachishshannonke yiinohu xaphoomu ministirchi; “busulu manchi Remedaana Ramadaanu geeshsha keeshshiishshanno” yinanninte gede Ramadaanu qoorre yannara afi`noommo elto, ayyaanaame wolqanna diina qeelle assate dhuka aananno Ramadaanu geeshsha sufisate badhera higa dihasiissanno yee xawisino.
Ramadaanu agana Musliimete daga baalanti quqquxotenninna sinsinnunni agartanno agana ikkasi coyi`re; Ramadaanu Musliime qoorretenninna Ibaadunni kaaliiqi ledo xaaddanno, zikiri bati`ranno, danchumma luphi yitanno, maarotenna maassote agana ikkasi buuxisino.
Qullaambete agani Ramadaanu daanno geeshsha ammanaano tonaamitte jifammete aganna sayissannota xawisinohu xaphoomu ministirchi Abiy Ahimed (D/r); Ramadaanu daanno geeshsha baca cinca, danchu loosira batinse sharrama agarantanno yiino.
Xaphoomu ministirchi xawishshi garinni; badheessu Ramadaanu gedeenti; badheessu soorro kalaqqinohu haaru hexxote caabbichi daanno geeshsha baca jifo, mitiimma, baca cinca xa`minota xawisatenni tonaamitte aganna gedensaanni Ramadaanu daa gattannokkkinte gede baala, soorrono digattannotenka.
Yanna iillitino hedo uurrissara dandiitannoti uulla wolqa heera hoogasenni tunsichu mageeshshi geeshshsano seediriro barru xawaabba gatisa dandaannokkitanna qeelame xawaabbaho darga agurannota xawise; lee agana wo`ma tunsichu xaadannonsari aliyyenna wodiidi qooxeessubba nafa konne halaale farcidhannota huwachishino.
Ramadaanu agani daasira albaanni seeda 11 aganna qarrubba noosita xawise; dayihu gedensaanni qole eltotenna izimmate qoorre ikkannokki gede sheexaanu wole jifo abbannosi yiino.
Halaalaanchu ammanaanchi lamenkanni dandee uurre kaajjillunni sa“annoha ikkanna badheessu soorrono togoota ikkase xawisatenni daasira albaanni batinye sanna agarrannanna quqquxammanna hee`rino, baca ilamate kakkalooshsheno xa`mino yiino.
Soorrote gedensaanni qole gobba soorrantannokki gedenna jiroo`mitannokki gede hasidhanno wolquwanni baca qarrubba xaaddinose yiinohu xaphoomu ministirchi; maala`lisannokkiha ikkino coy, lamenti qarrubba jiffannore; kayinni qeelantanno qarrubba ikkansa coyi`rino.
Ninkeno badheessu soorronni afi`noommo balchoomma jireenyanke buuxinseemmo aantino gafa geeshsha amande sufa hasiissannonke yiinohu Abiy (D/r); gatona yaanna baxillu balchoommanke ikkansanni baxillunni ledamanna maarotenni sa“a qara wodhonkeeti yiino.
Dhaggete hiiqqamme sissanna daganna dagoomu mittimmanke kaajjisha ajuujankeeti yiinohu xaphoomu ministirchi Abiy (D/r); ledama doogonke, jireenyu gawalonkeeti yeeno huwachishino. Kuri balchoomma soorrote saninni xaaddannonke qarrubba giddonni fulleemmonna aantino gawalo geeshsha iillineemmore ikkansa xawisatenni; konni gawalono Itophiyu duuchu handaari jireenya ikkinota xawisino.
Abbebech Maatewoos
Bakkalcho Dotteessa 3, 2016 M.D
