Hawaasa:- Abbay kofatto hananfoonnihu Badheessa 24/2003M.D ikkanna tenne yannara 13 diro ikkinosi. Ijaarunnihu siivilete loosi 99% gumulaminoha ikkanna; nirinni hanaffe lame Terbayneno caabbicho burqisa hanaffino.
Abbay kofatto ijaari gumulo afi’ranni noota kora assine hasaawinsoommori Hawaasi quchumi teessaano uytino hedonni; kofatto co’o yite gumulo afidha geeshsha irkonsa kaajjishshe suffannota coyidhino.
Sintaayyo Boggaalehu Hawaasi quchumi mootimmate loosaasinchooti. Abbayi kofatto ijaarante gumulote geeshsha iillasenni hagiirru macciishaminosita xawise; kofatto Itophiyaho lophotenna Jireenyu kaima ikkinota buuxisino.
Abbay kofatto isiranna gobbasira ha’nura jirosi ikkinota qaagiissinohu Sintaayyo, baadiyyete tunsichoho noo amuwi qarra tiratenni sa’e gobbate lopho alba higge qaaffanno gede assitanno kofatto ikkase kulino.
Konnira, konni albaanni shoole doycho boonde hidhinota kulinohu Sintaayyo; kofattote ijaarshi gumulama geeshsha isiwiinni agarranni qeecha fulannota coyi’rino.
Wolu quchumu teessaanchi Toomaasi Waaqohu, Abbayi kofatto ijaarante jeefo afidhuro Itophiyu su’ma Afirikahonna kalqete gotti assitannota coyi’re; kofatto wo’ma wolqanni caabbicho burqisa hanaffuro wolqa hiratenni gobbaydiha woxu soorro afi’nannita xawisino.
Toomaasi, kofattote ijaarira aganu damoozasi sase hige uynota kule; xaano kofattote assinanni irko kaajjishe sufannota buuxisino.
Abbay kofatto ijaarante tenne yannara gmulote deerra iillasenni jawu hagiirri macciishaminosita xawisinohu wolunku quchumu teessaanchi Taddese Teshoomeho. Isi coyi’ranni, Abbayi kofatto mittu mittunku qansichi kiisenni fushshine ijaarroonni Afirikuha jawa ijaara ikkinota qummeesse; baxxinohunni, baadiyyete noo amuwi qarra tirtano, saeno gobba miinjunni lophitanno gede assate dhuki noose kofattoot yiino.
Tini kofatto soorrote albaanni kalaqamino qarrinni loosu aana foonqe kalaqanteenna daga huluullanturo nafa kalaqantino foonqe taashshine tenne yannara gumulote iilla wodanasi tashshi assinosita kule; xaano gumulote geeshsha dilaalasi fulannota coyi’rino.
Abrahaam Saamueel
Bakkalcho Badheessa 26, 2016 M.D
