Hawaasa: Maatete Jireenyi inisheetiivenna paakeejje aana qoqqowu mereershi mootimmate loosaasinera qajeelsha uyni.
Sidaamu Qoqqowi Pilaanetenna Latishshu Biiro “Maatete Jireenya baalunkura” yaanno uminni qoqqowu mereershi mootimmate loosaasinera maatete Jireenyi inisheetivenna paakeejje aana sa’u Sanyonna Maakisanyo barrubbara qajeelsha uytino.
Barraho barete leelle hasaawa assinohunohu Jireenyu Paarte Sidaamu Qoqqowi Sinu Borro Mini Sooreessinna Barru Wosinchi Kalaa Abiraam Maarshaallohu, assino hasaawinni; Sidaamu daga seeda yannara umose umisenni gashshate assitino sharro giddose miinjunna latishshu xa’mono hanqaffinote yiino.
Tenne dagate miinjunna latishshu xa’mo dawarate qoqqowu gede noonke injo badate xiinxallo assinoonni yiinohu Kalaa Abiraam Maarshaallohu, konninnino ‘767’ yaamantanno 7 inisheetivenna 67 paakeejje suudinse loosu giddora eate qixxaawo gundanni hee’noonni yiino.
Tini inisheetivenna paakeejje poletiku hajo ikkitukkinni baalunku dagoomi hajooti yiinohu barru wosinchi; tenne wo’munku dagoomi heeshsho soorrate assinanni sharrora baalunku umosi qixxeessatenninna inisheetivenna paakeejje garunni gumulatenni ilamate buxima ragisiisa hoogate qeechasi fulara hasiissannota xawisino.
Kalaa Abiraami xawishshi garinni; kuri xiinxallotenni bandoonninna maatete Jireenya buuxisiissanno inisheetivenna paakeejje qoqqowu gede gumulate injo no. Konneno qajeelshunni waanxiro woyyino guma maareekkisiiisa dandiinanni.
Qoqqowu pilaanetenna latishshu Biiro sooreessi Daawit Hayyeesso (Dr) isi widoonni; jiraameette daga kalaqate 10 diri mixo mixi’ne loosu giddora e’noonnita kule; konninino haammata gutu Jireenyi gumma borreessiisa dandiinoonni yiino.
Ikkollana, gutu Jireenyi mitte mittente maate mine eannoha ikkinokki daafiranna halchinanniha maatete Jireenya hasi’noonni deerrinni harancho yanna giddo maareekkisiisate mitiinsitannota buunxoonni yiinohu Biirote sooreessi; gutu Jireenyinni sainoha maatete Jireenya buuxisiisate tenne inisheetivenna paakeejje xiinxallotenni bande suudinsoonnita coyi’rino.
Mittu mittunkura dagasi latisate qeechi noosi yiinohu Soreessu; baalunku woyyino looso loosatenni dagganno ilamara buxima ragisiisatenni gatinso yaatenni coyi’rino. Tenne inisheetivetenna paakeejje aana mootimmate loosaasinera qajeelsha aa hasiissinohuno inisheetivetenna paakeejjete aana huwanyo afi’ratennino sae xeinori hee’riro hedo uytanno gedenna insano gumulatenni heeshshonsa soorritanno gede hedatenniiti yiino.
Kurinna labbanno paakeejubba gumulatenni wole gobbuwa gumaamma ikka dandiitinota affe dagankeno laote soorro abbite loonse lopha dandiinannita leellishshara hasiissannota sokkasi saysino.
Biiro maatete Jireenya buuxisiisate ‘767’ yaamantanno 7 inisheetivenna 67 paakeejje suudisse loosu giddora eate millimillote aana afantannota qummeessino.
Addisu Adoola
Bakkalcho Badheessa 26, 2016 M.D
