Addis Ababa:– Dagate riqiwamaano amaale mini hee’nanni mini kiri aana leeltannota garimale waagu lexxo gatisatenni yannate geeshshi mala ikkanno yinoha hee’nanni mini kiri qorqorshinna gashshooti lallawa kaajjishino.
Amaalete mini sayikki diri loosu diri 19ki uurrinshu songo lallawa roore huuronni kaajjishinoha ikkanna; lallawu garinni hee’nanni mini wodho sumimme lame dirrara ikkitanno gedenna baalante hee’nanni minna aana gumullannita hattono minnate waagi bikka mootimma murtannota xawinsoonni.
Lallawu hee’nanni mini kiri aana leeltannota waagu lexxo gargaratenni minu shiqisho aana leellanno qarra geisate dandiisiisannoho yinoonni.
Amaalete mini miillara xawishsha uyinohu Farcote ministirchi dokter Gedeyoon Ximootewoosi (Dr); lallawu kira aannohunna kirunni galanno manni qoosso suwashshimma agarate dandiisanno yino. Seerimma kaajjishannoha, xawadimma buuxisannohonna amanyoote dallaalootu anganni fushshannoha ikkasi qummeessino.
Lallawu minnate wodho kaimu birxe adhatenni lamu diri badooshshinni dikkote akatanna wolootta ikkitubba la’ne waaga murranni yiinohu Ministirchu; lallawu aana worroonni korkaatta gobbaanni lamu dirinni balanxe kirunni galanno manna mininni fushshano ikko waaga leda dandiinannikkita lallawunni la’noonnita coyi’rino.
Minu kiri kaimu waagi ikkannohu kirunni galannohunna gashshitanno mannooti wodhonsa garinni sumuu yitino garinni ikkanno yiinohu Ministirchu; mootimma lamu diri badooshshinni dikkote akata, miinju akata hedote giddo woratenni kiru bikka murtannota xawisino.
Mine kirunni adhino manchi mine amadino illachi gobbaanni horonsi’riro, qooxeessu ga’labbonna keere hunannoha ikkiro, kirunni adhino mini aana dano iillishannoha ikkironna e’noonni wodho garinni kiru waaga baata hoogiro minu anni fushshara dandaannota lallawunni gumulloonni.
Kirunni aanno manchi minesi asalunni amadisiisiha ikkiro, hireenna hidhinohu e’’ara hasi’riro kirunni adhino manchira 6 aganira qorophishsha aatenni mininni fushshara dandaannota lallawunni worroonni. Mine aamamooshshunni wolu manchira sayinsiro kayinni kirunni adhinohura wodhote yanna agarantannosita qummeessinoonni.
Kirunni adhino manchi lamu diri albaanni wodhosi yannanni balaxe fulara hasi’riro lame aganna albaanni egensiisatenni fulara dandaannota lallawu aana worroonnita huwachishino.
Kirunni galannohunna kiraho uyinohu widoonni wodho borreessiisa hooga gashshootu qoricha abbitanno yinohu ministirchu; borreessinoonnikki wodho e’noonnikki gede kiirranni, giwire maaxa seerunni xa’misiissannota ikkase huwatatenni borreessinanni gede jawaachinshanni yiino.
Lallawu kaajjihu gedensaanni mittu agani giddo wodhote borro gumulama nooseta qummeessatenni; borro sasenna shoole aganna geeshsha seeddara dandiitanno akati hee’rara dandaannota xawisino.
Mine kiraho aa jawaachinshanni yiinohu Gedeyooni (Dr); mine minte fano wortannori minu annuwi kiraho uyitukkinni mittu diri ale keeshshituro taaksenniha 25% geeshsha ledotenni baattanno gede assinanni hayyo lallawu garinni diriirsinoonnita qummeessino.
Togoo harinsho wolootta gobbuwara gumullanni, luphiima minu anje hedote giddo woratenni murroonni hedooti yaanni xawisino. Labbanno hayyono aantete daddalu minna aana kalanqara dandiinannita xawisino.
Lallawu qara minu shiqisho qarra tira hoogirono mittu manchi kirunni adhino mine lamu diri geeshsha kirasi baaxxanni hee’ranno gede dandiisannota huwachishino.
Lallawu Addis Ababahonna Dire Daawaho hattono woshshamaanchimmansa qoqqowoho ikkitino quchummara gumulantannota egensiise; qoqqowubba noo akata la’e murtanno akati garinni gumulamannota coyi’rino. Ikkollana Hoteele, Riizorte, wosinu fooliishshi’ranno mininna woloottu daddalu fajjonni kiraho uyinanni minna aana gumulantannokkita kulino.
Qiddist Gezzaheny
Bakkalcho Badheessa 26, 2016 M.D
