Addis Ababa:- Abbayi kofattora assinanni hee`noonni beeqqo daga latishshahonna Itophiya soorrate noose hasatto leellishshanno yee kofattote dagate beeqqo qineesso botto mini dayrekiterchi dokiter Aregaawi Berihe coyi`ri.
Dokiter Aregaawi kofattote hanafo 13ki diro lainohunni Itophiyu pireesete uurrinsha ledo assino keeshshonni coyi`rino garinni; kofatto konne deerra iillitara dandiitinohu taxxi yitinokki Itophiyu daga beeqqo hee`rasenniiti. Abbay kofattora assinanni hee`noonni beeqqo daga latishshahonna Itophiya soorrate noose hasatto leellishshanno.
Kofattote ijaarshi irkonni beeqqitanni noori gobba giddonna gobbayidi gobbuwara afantanno Itophiyu dagaati yinohu dokiter Aregaawi; assinanni hee`noonni beeqqono gobba hasidhanno soorro meessi dhukinni umosi dandiino miinja gatamarate gumaamimma leellishshannota ikkase huwachishino.
Daga xaa geeshsha wolootta irkuwanni gobbaanni woxunni calla luphiima irko assitinota xawise; 8100 aganunni tonne miliyoone birre ale e`anni noota buuxisino.
Konni ledo amadisiisame daga qineessate ragaanni noo mootimmatenna dagate qinaambeno hiittenne yannannino aleenni kaajjite suffino yee huwachishino.
Mootimma daga qineessatenninna dipiloomaasete ragaanni loossanni noo loossano gumu borreessamara jawu qeechi noonsata kaysino.
Uurrinshu dipiloomaase qotira dagatenna dagate xaadooshshe assatenni taalchimmatenni gutu horaameessimma heedhanno gede daga qineessate loosantino loossano kaajjishanno gumi borreessaminore ikkansa coyi`rino.
Ledotennino mootimmate widoonni lagiidi gobbuwa qineessate haammata sumiimme assinanni keeshshinoonnita coyi`re; Gibitse labbino gobbuwa Itophiya miiccino keeshshitino sumiimme gumulantanno gede hasidhannoha nafa ikkirono mootimma gutunni horonsi`rate kakkaooshshe adhatenni insa ledo loossanni afantannota xawisino.
Dokiter Aregaawi xawishshi garinni; xaa yannara kofattote loosi xibbuunni 95% jeefino. Xaphooma amadanno 74 biliyoone meetir kiyube wayinnino 42 biliyoone meetir kuyube amadisiisa dandiinoonni. Lame terbayinubba looso hanaffinoha ikkanna ontu muli yanna giddo looso hanafanno.
Ledotennino Abbayi lagi agarranniha haanja haruma afira hoogiro lolahunni daanno bushshu kofattote looso gufisanno yinohu dokiter Aregaawi; konnirano wolqate loosinni assinanni beeqqonni qarqaru agarooshshi ragaanni assinanni qeechino woxu aleenni ikkasi coyi`rino.
Abbebech Maatewoos
Bakkalcho Badheessa 26, 2016 M.D
