Addis Ababa:- Qoqqowoho yannite tekinolojenni baatto loosi’rate hayyo baalante loosidhe galtinori qooxeessubbara halashshate illachinshe loonsannita Sidaamu qoqqowi Irshunna kalaqamu jiro latishshi Biiro egensiissu.
Qoqqowoho umikki yannara loosidhe galtinori feestivaale tenne lamalara harinsoonni.
Feestivaale 2015/16 laalchu dirinni Irshu latishshinni luphiima guma maareekkisiissinori loosidhe galtinorira afanshanan baraarsha aatenni jawaachishate ikkinota Biirote sooreessi kalaa Memmiru Moke tenne yannara xawisino.
Feestivaalete 26 meento lede 131 labbaali loosidhe galtinorira afanshanna jawaachishate baraarsha qoqqowu mootimmanni uynoonnita egensiisino.
Gibrinnu latishshira luphiima qeechansa fultinori 77 gibrinnu ogeeyyeranna 17 uurrinshuwarano afansha uynoonnitano hattonni.
Biiro xaa yannara yannitte tekinolojenni Irshu looso halashshatenninna qaddo loosidhe galtinoriha dancha lawishsha baalante loosidhe galtinorira halashshate loossanni nootano lede egensiisino.
Konninni, gibrinnu laalchonna laalchimma lossatenni latishshu beeqqaanonna horaameeyye assate illachinshoonnita coyi’rino.
Qoqqowu deerrinni harinsoonni feestivaalera leelle hasaawa assinohu qoqqowu pirezidaantichi Desta Ledamo coyi’ranni; gibrinnu loosi sagaletenni meessaneete dandaate, buxima hunatenna miinju dhuka lossi’rate noosi qeechi luphiimaho yiino.
Loosidhe galtinorino qoqqowu mootimma buxima hunate amaddino ajuuja adda assate harinshora luphiima qeechansa fultanni afantannore ikkansa buuxisino.
Pirezidaantichu lede xawisanni; gibrinnu handaarinni loonseemmori buxima dhagge assate ikkadu laalchi dikkote shiqanno gede hattono Jireenya buuxisiisate ragaanni jawa qeecha afi’rinoha ikkasinni addi illacha tunge loosa agarrannita huwachishino. Konne assateno loosidhe galtinore yanna yannantenni jawaachishanna afansha uynanni hara hasiissannota kulino.
Gaazeexu Odeessaanchinni
Bakkalcho Badheessa 26, 2016 M.D
