Addis Ababa:- Fichee-Cambalaallate ayyaana hornyase agarre ayirrinsannita Sidaamu Qoqqowi Woga, Turizimenna Ispoortete Biiro Sooreessi Kalaa Jaggo Agenyehu xawisi. Tayxeha Fichee Cambalaallate ayyaana ayirrisate amanyoote lainohunni Sooreessu uyno xawishshinni; tayixenni honsikki diro ikkanno yannara UNESCOte kikkinsannikki dona ikke borreesaminohu Sidaamu Diru Soorro ayyaani, yanna yannatenni iibbinonna biifino garinni ayirrisamanni keeshshino yiino.
Ayyaanu danchu garinni ayirranno gede babbaxxitino komite uurrinseenna loosu loosamanni keeshshinota xawisinohu kalaa Jaggo; ayyaanto dagate lallabbe egensiissino garinni tayixeha ayyaana Badheessa 27-28/2016M.D ayirrinsanniha ikkanna; konne ayyaana ayirinsanni yanna geeshsha babbaxxitino Ispoortete ikko quchuma biifisate loosonna wedellu dagooma kaa’late loossa loonsanni hee’noonnita xawisino.
Ayyaana ayirinsanni barra xiinxallote borro lendanna woleno babbaxxitino budu hornyubba xawissanno qixxaawo shiqqannoha ikkanna; dagateno addi addi sokka sa’annota buuxisino.
Ayyaanu keerunniha, araarunniha, mittimmanniha hattono mimmitu ledo sumuu yine ji’line intanni anganni sayinsanniha ikkinohura baalunku maatete deerrinni qarqaru dagooma woshshe ji’le itanna agatenni hagiidhe sayisatenni baalunkura budenke roorse bowirse xawisa agartannonketa qaagiissAino.
Ayyaanu lallawu barrinni kayise araarunni, maatete deerrinni baxxitino qixxaawo assatenni, noohu hooginosihu ledo ite age hagiidhe sa”ate qixxaawo assate gumulle wosina adhineno wosinsirate feeffantanni hee’noonnita guwuursino.
Ayyaanu, Badheessa 27/2016M.D. hawarro geerru maassonni hanafe qeexaalunni, faarotenni, faradu gulufonna wole addi addi godo’lenni budu hornyase agarino garinni ayirre cambalaallate soodono baxxino garinni sooreessu gudumaalira iibbe sufanno yiino.
Ayyaanu gobbankennino sae gobbate gobaannino biife ayirrannoha ikkasi kule; ayyaana ayirrisate ledo budu donnankenna hornyubbanke seekkine agadha baalunku gadachooti yiino.
Jeefoteno ayyaanu Kalqete, Gobboomunna Sidaamu Dagara keerunniha, baxillunniha, mimmitu ledo halamannihanna atootu ashilenniha ikkanno gede kalaa Jaggo halchosi xawisino.
Gaazeexu Odeessaanchinni
Bakkalcho Badheessa 26, 2016 M.D
