Addis Ababa:- Qoqqowu daga latate, lophatenna jiroo`mate hasattonsa kaajjado mootimmatenna paartete massagonni adda ikkitanno yaanni Sidaamu qoqqowi pirezidaantichi Desta Ledamo coyi’ri.
Sa’u lame lamalanni kayise techo geeshsha qoqqowu pirezidaantichinna jajjabba sooreeyye ijaarante gooffino addi addi pirojekitubba maassiissanni; haaroo pirojekittubbano hanafisiissanni afantanno.
Qoqqowu mootimmanni Alatta Cuukkote quchumira ijaarrannita xalalu anganni way pirojekite looso tenne lamalara hanafisiisinohunna ijaarshunniha safote kincho worinohu pirezidaantichu Desta Ledamo coyi’rino garinni; qoqqowu daga latate, lophatenna jiroo`mate hasattonsa kaajjado mootimmatenna paartete massagonni adda ikkitanni noota techo pirojekite ijaarshi dancha lawishshaati yiino.
Jireenyu paarte massagonni hanafantino dagoomittetenna miinjitte latishshu loossa giddo mitto ikkinohu xalalu anganni way shiqqonna owaantetennino iillado assatenni daganke horaameeyyimma buuxisiisa ikkanna; handaarunni co`icha, ammansiisannonna ikkado xalalu way shiqqo looso baalunku qoqqowu qooxeessubbara illachunni loonsanni afammannitano xawisino.
Sidaamu qoqqowi Way, Shiilotenna Wolqate Biiro sooreessi Injiiner Kebbede Ganoole isi widoonni; qoqqowoho babbaxxitino qooxeessubbara haammata pirojekitubba ijaarantanni noota xawise; Alatta Cuukkote quchumira sase jajjabba bale unsiisatenninna ijaaratenni 18 aganna giddo jeeffe dagoomaho owaante uytanno yine loonsanni afammanni yiino.
Xaa yannara Alatta Cuukkote quchumira ijaaramanni noohu xalalu way pirojekite xaphooma 55,000 ikkitanno quchumu teessaano horaameeyye assitannota ikkase hanafisiisatenna safote kincho tugate amanyooti aana coyi`rino.
Pirojekite amandoonninsa yanna giddo isilanchimmatenninna rahotenni jeeffe dagoomunniha xalalu anganni way xa`mo dawarate dandiissanno gede Biiro baxxino illachinni loossannota Sooreessu lede buuxisino.
Amadisiisantino odoonni, Haweeli woradira sase olluubbara iillanno 125 miliyoone ali birri fulonni ijaarroonni xalalu anganni way pirojekite sa’u lamalara faajjetenni maassiinseenna horo aanno gede assinoonniti qaangannite.
Haweela Liida ijaarroonniti Hayyisa Bara way pirojekitera 125.7 miliyoone birra fulo assinoonniha ikkanna; pirojekite lamu gandinni 350 meetirkuube waa amaddannoha hattono sase olluubbara heedhannore 27 kume ali daga horaameeyye assitannota kulloonni.
Qoqqowoho xalalu anganni way shiqqo lossateno diru dirunkunni 1 biliyoone birri ale fulo assinannitanna; 2016M.D goofimarchira xalalu anganni way iillo 66% iillishate loonsanni hee’noonnitano xawinsoonni.
Dagooma miinjunni, dagoomittetenna poletiku handaarranno horaameeyye assate mootimma illachishshe loossanni nooha ikkanna; ijaarroonni pirojekitubba garunni agarooshshe assatenni seeda dirrara horo uytanno gede assa noonsata huwachinshoonni.
Amsaalu Felleqe
Bakkalcho Badheessa 26, 2016 M.D
