Addis Ababa:- Abbayi kofatto ijaarshi harinshonni xaaddino jifo soorrote mootimmanni taashshi`ratenni daga agartanno guma afi`noonni yaaanni Layinki xaphoomu ministirchi kalaa Temesgen Xiruneh coyi’ri.
Abbayi kofatto ijaarshi hanafaminoha 13ki diro korkaata assatenni qixxaabbino hasaawu bare oyimbarra harinsoonni.
Barete aana hasaawa assinohu Layinki xaphoomu ministirchi kalaa Temesgen Xiruneh xawisino garinni; kofattote ijaarshu harinshonni xaaddino jifo soorrote mootimmanni taashshi`ratenni daga agartanno guma afi’noonni.
Kofattote ijaarshi harinshonni adhantino taashshote qaafubbanna rakkino murora xaphoomu ministirchi Abiy Ahimed (D/r) qeecha mamooteno hanbannikkita coyi`rino.
Abbayi kofattora waa wonshate mixi`noonni garinni gumulantinota buuxise; 42 biliyoone meetir kiyube ali waa amadino mannu anganni loosamino xashsho kalaqa dandiinoonnita qummeessino. Kofatto wo`munni wo`ma jeefisantukkinni qulxu`mete laalcho hattono caabbichu wolqa horonsi`ra dandiinoonni yiino.
Itophiyu daga kofattote ijaarsha dipilomaasete harinshonni qeelloommohu Adiwu gaadi gede mittimmatenni ka’’ankenniiti yiinohu kalaa Temesgeni; xaano xaaddinonketa keeru jifubbanna buximatenni fulate wo’naalsha qeelletenni fulatenni Itophiyu Jireenya buuxinseemmo yanna xeerto dikkitanno yiino.
Latishshanke hasidhannokki wolquwa kofatto uminke dhukinni ijaarsate ka`nummo yannara hasiissannokki korkaatta shiqishatenni sharrantinotanna kalqete barubbara Itophiya kassassinota qaagiisse; kofattote ijaarsha ayno uurrisinkekkiinni kalqoomu deerrasi agarinonte gede jeefote gafira iillasi yaasi gobbate gede seyoote yiino.
Kofatto xa noo jeefote gafira iillitanno gede qeechansa fultinoriranna cincite sharrantino yekkeerote komite miillara, angansa diriirsitino Itophiyu dagara, Itophiyu ilamanna Itophiyu baxillaanora hattono ijaarshu loosinni beeqqitanni afantanno baalira Layinki xaphoomu ministirchi galatasi shiqishino.
Barete aana afaminohu Wayinna Wnerjete ministirchi Injiiner Habtaamu Ittefa isi widoonni; xaa yannara Abbayi kofatto ijaarshi xibbuunni 95.8% iillino; kofattote qaru bisi ijaarshi qole xibbuunni 99% ale ikkinota xawisino.
Abbayi kofatto Itophiyu daga halantino cigilenni calla gobbayidi irkonna kaa`lo nookkiha ijaaramase Itophiyu daga gutu mixora gutunni uurra dandiitannota leellishshino hattono xashshubbansa aana taalo horonsirate qoosso noonsata kalqete leellishshinote yiino.
Abbayi kofatto ijaarshinni gumulloommo jawa mixora qoteho jajjabba pirojekitubba massagatenna ijaarsate rosicho kalaqi`noommonna mittimmanke kalqoomu dagoomira leellinshoommoho yiinohu Ministirchu; xaphooma 750 meegga waatte burqisate dhuki noonsare lame Terbayinubbate looso hananfoonnitano coyi`rino.
Barete aana Layinki xaphoomu ministirchi kalaa Temesgen Xiruneh, Wayinna Wolqate ministirchi Injiiner Habtaamu Ittefa, haaroo`mate kofatto ijaarshi qineesso borro mini qaru dayrekiterichi Aregaawi Berihe (D/r), babbaxxitino fullahaanonna wolootta hajo la`annonsa bissa afantino.
Barraho Abbayi kofatto ijaarshi harinshubba leellishshanno misilubba la’’ote shiqqe towaatantino.
Barete aana Itophiyu poostu owaante kofattote 13ki diro korkaata assatenni qixxeessitino Abbayi Kofatto qaaggote Teembireno faajje assitino.
Abbeabech Maatewoos
Bakkalcho Badheessa 26, 2016 M.D
