-Sa’u 6 aganna giddo iillitino tiraafiikete danonni 46 manni lubbamino
Addis Ababa:- Sidaamu qoqqowira kalaqantanno tiraafiikete danonni haammatu manni lubbonna jajju aana gawajjo iillitanni noota Qoqqowu Doogote Latishshinna Hodhishshu Biiro egensiissu
Biirote doogote hobbaatinna medihin fendi handaari sooreessi Koloneel Roddamo Kia Itophiyu pireesete uurrinshara xawisino garinni; qoqqowoho sai dirira iillitino gawajjo luphiima ikkasenni amandoonni dirinni tiraafiikete dano ajishate mixotenni loonsanni afammanni.
Xaa yannara Federaaletenni uynoonni baxxino illachi kaiminni konni albaanni addi addinni loossanni keeshshitinore hodhishshunna medihin fendi handaarra mitteenni waaxatenni qorqorshaho injiitanno tantano kalanqe lifixino garinni mannunna jajju aana iillitannota tiraafiikete dano gargadhate looso loonsanni hee`noonnita xawisino.
Konni kaiminni, umo hanafantino loossa kaajjishatenni harancho yanna giddo dano wo`munni wo`ma gatisa hoongirono; ajisha hasiissannota ammanne loonsoonni haammata loossanni sa’u 6 aganna giddo reyonna luphiima gawajjo ajisha dandiinoonnitano sooreessu coyi`rino. Koloneel Roddamo xawishshi garinni; mannu reyonna gawajjo ajjurono; jajjunna jirote aana iillitanni noo gawajjo kayinni lexxate akati leellino. Lubbote aana ajjanni gaggino dano dancha hedeweelcho gede adhine lexxitinota ajishatenni roore woyyeessate keennenna Federaalete mootimma ledo raga worre hattono hajo la`annonsa bissa ledo ikkatenni layinki diri mixo amande loonsanni hee’noonni yiino.
Dano ajishate qinaawinonna rahino qorqorsha assitanno wolqa gaammoonni yaannohu sooreessu; baxxinohunni, qoqqowu poolisete komishiine ledo xaadooshshe kaajjishatenni gutunni loonsoonni loosinni guma abba dandiinoonnita xawisino. Dagoomunna oofaasinete huwanyote loossa loonsoonnino yiino.
Sa’u lee aganna giddo iillitino tiraafiikete danonni 46 manni lubbaminoha ikkanna; 24 manni aana kaajjado ikkitino bisu gawajjo iillitinotanna jajju gawajjo kayinni xibbuunni 30% lexxitanni hadhinota koloneel Roddamo egensiise; mannu reyo xibbuunni 40% hattono kaajjado bisu gawajjo xibbuunni 19% ajisha dandiinoonnita buuxisino.
Qoqqowu gede eelallicho ikkitino qooxeessubbara, lame doogo dagge xaaddannowanna Hawaasi quchumira tiraafiikete bobbaaso korkaatinni roorenkanni xexxerrisunni iillitanni noo dano luphiima ikkitinota qummeessino.
Tiraafiikete dano hedeweelcho xaaddannota ikkasenni poolisetenna tiraafiikete handaarra ledo qinaawatenni qorqorshunna seera agarsiisate loossa baxxino illachinni loosa hasiissannota coyi’re; dano batidhanno dargubbara ranke ajishshanno bireekere ledatenna gatamarate looso illachunni gumullanni hee`noonnita xawisino.
Mite mite gobba tayisse sa’anno doogo qaccera roorenkanni quchumma xaaddannowa heedhanno teessaano dano batidhanni noohu kaameellate wiinamme ajishannori nookkihuraatina rahotenni loonsonke yitanni kayissino hedora koloneel Roddamo dawaranni; “Gongo’mishamaanote wiinamme ajishshanno loossa gumulate yawo mootimmannite; baxxinohunni doogotenna hodhishshu Biiroho; qoqqowu giddo wiinamme ajishshanno bireekere ledatenna haaroonsa hasiissannore haaroonsate loosi gobbaanni dagoomuwiinni ka”anno koffeenyi qoqqowu gede xawinsanniha dikkino” yee; kayinnilla, Federaaletenna hajo la`anno handaari ledo ikkatenni illacha uyne loosa agartanno yiino.
Jeefoteno, mannunna jajju aana iillitanno dano gargadhate hajo la`anno bissa, amma`note annuwanna gobbate geerri uminsa qeecha fultanno gede xa`mino.
Abbebech Maatewoos
Bakkalcho Badheessa 19, 2016 M.D
