-Boondete lamalanni 100 miliyoone birra gamba assate mixi’noonni
Addis Ababa:- Abbayi kofattora Boonde hidhate lamala ‘’Gutunni dandiinoommo’’ yaanno adawarshinni beronni hananfe harinsanni hee’noonnita Bayiriidi Haaroo’mate kofatto qineesso pirojekite borro mini egensiisi.
Pirojekitete borro mini bero uyno xawishshinni; ‘’Gutunni dandiinoommo’’ yaanno adawarshinni ijaarshu loosira jiro gamba assate loossara qixxaabbinoha ikkanna; kuri loossa giddonni mitto ikkinohu Bayiriidi Haaroo’mate kofatto ijaarshi loosira boonde hidhate lamala beronni hanafe wo’mante gobbate qooxeessubbara harinsanni hee’noonni.
Bayiriidi Haaroo’mate kofatto qineesso pirojekite borro mini Miidiyu xaadooshshi dayrekterchi kalaa Haylu Abrahaami xawishshisinni; amandoonni baajeettete dirinni kofattote ijaarshi loosira xaphoomunni 2 biliyoone birra gamba assate mixi’noonniha ikkanna; sa’u sette agannara 931 miliyoone, 984 kume 102 birra gamba assa dandiinoonnita egensiisino.
Eo gamba assinoonnihu gobbate giddo Boonde hiratenni, Diyaasporuwinni, 8100 harancho borrote sokkanni, Itophiyu caabbichu wolqa owaantennni hattono wolootta bu’anni ikkinota xawisino.
Bero hanafoonni Boondete lamalanni 100 miliyoone birra gamba assate mixi’noonniha ikkanna; Boonde hirtannori Itophiyu latishshu Baanke, Itophiyu daddalu Baanke, hattono woloottu woxu uurrinshuwa ikkitanna balaxote qixxaawonsa guddinota xawinsoonni.
Ikkinohura, wo’munku Itophiyu qansooti Boonde hidhate lamala beeqqaano ikkatenni ijaarshu loosi goofara iillinohu Abbayi kofattora xaano agarranninsaha qansichimmate qeechansa fultara borrote mini woshshatto assino.
Maaja 2015M.D kayse Ammajje 30/2016M.D geeshsha noo sa’u sette agannara 931.9 miliyoone birra gamba assa dandiinoonni yinohu borrote mini xawishshisinni; sa’u 13 dirrara dagate irkonni 19.1 Biliyoone birri ale gamba assa dandiinoonni yiino.
Boonde hidhitinorinna Boondete baatooshshi yannara iillitino qansootirano 1.25 Biliyoone birra qolloonniha ikkanna; roorima ikkitannori wirro Boonde hidhitanni yanna seedissinore ikkansa xawisoonni.
Abbayi kofatto Itophiyu qansooti dhukinni calla ijaarantanno noota jawa gobboomu pirojekite ikkase kule; albillichono ijaarshu loosi gumulama geeshsha wo’manti Itophiyu ilama irkonsa kaajjishshe sufisiisa hasiissannota lede qummeessino.
Amsaalu Felleqe
Bakkalcho Badheessa 19, 2016 M.D
