Addis Ababa:- Sa’u tonne barrubbara Federaalete irkotenna harunsote gaamonni assinanni keeshshinoonni towanyo kaajjadonna rooru loosira kakkayissannota ikkase Sidaamu Qoqqowi Mootimmate Xaadooshshi Biiro xawissu.
Woxu ministirchi kalaa Ahimed Shidehunni massagantinoti Federaalete irkotenna harunsote gaamo qoqqowoho assitanni keeshshitinoti loosu towanyo gummaamo ikkino garinni jeefantinotano Biiro kultino.
Towaanyo goofase harunse Itophiyu pireesete uurrisha ledo hasaawa assinohu Sidaamu qoqqowi mootimmate xaadooshshi Biiro sooreessi kalaa Woseniyelleh Simiooni xawisanni; Federaaalete mootimma 2016 baajeettete diri 6 agani loosu keeno biso ikkitinota loosu towanyo woxu Ministirchi Ahimed Shidehunni massagantinoti Federaalete harunsotenna irkote gaamo qoqqowoho assitanni keeshshitinota xawisino.
Konni garinni sa’u tonne barrubbara gaamo qoqqowoho zoonnatenna woraddate geeshsha iillite addi addi latishshu loossa towaattanni keeshshitinoha ikkanna; qarunni sase babbaxxitino basera, Hawaasi quchumira, Aliyyenna mereerimu Sidaamu zoonnara addi addi latishshu loossa doyite la’inota kulino.
Gaamo doyte la’ino latishshu loossa mereerinni Gibrinnu, maatete Jireenyi, ga’labbote akata, rosu, fayyimmate, loosu kaayyo kalaqo, womaashsha horonsi’nanni garanna Industirete latishshi loossa noo deerra towaattinota kalaa Woseniyellehi xawisino.
Xaphoomunni gobbate gede miinja lossitanno yine amandoonni bixxilluwa (gibrinna, shiilo, Industire, ICT na daa’’atto) mereersino garinni gumulantanni noo loossa afantanno deerra towaattinotano buuxisino sooreessu.
Gaamo lamewa beehante towaanyo assitanni keeshshitinotano kaysino.
Ga’labbote widoonni assitino towanyonni qoqqowoho daganna mootimma waaxante loossino loosinni keeru widoonni noo rosichi wole qoqqowubbara lawishsha ikkara dandaannota keenansano hattonni.
Maatete jireenya lainohunni qoqqowoho 7 inishiyeetiivenna 67 paakeeje qixxeessine loosu giddora e’noonniha ikkanna; konninnino qoqqowu rosicho ikkara dandaannota eeli geeshsha dirrite assitino towaanyonni buuxissinotanna wolootuno rosunna fayyimmate widoonni assinanni millimmo hagiirsiissannota ikkase buuxissino yiino.
Qoqqowu garinni amandoonni mixo gobbate gede amandoonni mixo ledo waaxante hadhanni noota keentinota kalaa Woseniyellehi kulino.
Konni gobbaanni gibrinnu looso kaajjishate Baarzaafe Sidaami giddo hala’lite leeltanno daafira tenne haqqe umme hoolle dargaho sagalimmate hosannorenna baatto shaqqishanno kaashsho kaasa hasiissannota gaamo keente taashshinanni hedo wortinotano qummeessino.
Hattono Industirete widoonni Hawaasinna Yirgaalamete paarkuwara hasiissanno e’’o ikkadu garinni shiqishate qooxeessaho afantanno loosidhe galtino daga hasiisannorinni irkisanna jawaachisha hasiissannota kayisse; handaaru handaarunkunni hananfoonnire latishshu loossa kaajjishe sufanna sekterrate garinni loosama hasiissannore kultinota buuxisino.
Gaamo uytino hedo garinnino aantete zoonnatenna woraddate hajo la’annosari ledo waaxamme foonqe noowa taashshate loosu giddora e’neemmo yaanno illacha qoqqowu mootimma widoonni amandoonnita Biirote sooreessi kalaa Wosenyellehi lede xawisino.
Qiddist Gezzaheny
Bakkalcho Badheessa 19, 2016 M.D
