– Federaalenniti irkotenna harunsote gaamo
Addis Ababa:- IFDR Woxu ministirchi Ahimed Shidenni massagantinoti Federaalete irkonna harunsote gaamo sa’u tonne barrubbara qoqqowoho assitino keeshsho lainohunni xawishsha uynoonni.
Irkotenna harunsote gaamo Sidaamu qoqqowira 10 barrubbara assitino keeshshonni addi addi zoonnara eeli geeshsha dirrite qoqqowoho loosamanni noore towaattino. Towaanyote filiqishsha lainohunni xawishsha uyinoonniha ikkanna,gaamote massagaanchi IFDR woxu ministirichi Ahimed Shide “Sidaamu qoqqowo ikki kawa harancho yanna ikkirono; duuchu handaarinni maareekkamanni noo gumi addintanni jawaachishannoho” yee xawissino.
Gaamo Qoqqowoho assitino keeshshonni, qoqqowoho keerenna ga’labbo buuxisiisate dagooma beeqqaano assine loonsoonni loossa kaajjado ikkase kayissino.
Hawaasi quchumira yannitte hayyubba horoonsi’ne loonsoonniri jawaachishannorenna qachu qoqqowubbanni ledo gutu keerinna ga’labbo teessiisate loonsoonniri albillichono sufa noosita kulloonni.
Danchummate assooti loossano dagooma horaameeyye assitinota gaamo towaatte buuxissino.
Haanju harumi loossano mixotenni 80% ale gumula dandiinoonnitanna; sagalimmate ikkitanno kaashsho halashshate loossano jaawichishshannota ikkase gaamo naqqassino.
Gibrinnu loossa ragaanni la’noonnirino jawaachishanno guma ikkasinna saadate latishshi loossano gobbate gede dancha rosicho adha dandiinanniha ikkasi kulloonni.
Konni albaanni noohu bushshu madaabbari shiqqonna tuqishshi xe’ne tiratenni xaa yannara noo harinsho jawaata ikkaseno gaamo xawissino.
Maatete Jireenya buuxisiisateno ragaannino qoqqowu hanafino loossa woloottu qoqqowubbarano lawishsha ikkitannota kulloonni.
Bunu latishshi ragaanni noo millimmono gummaamenna laashshaano daganna handaarunni bobbakkino daddalaanonna dureeyyera assinanni irkonna harunsono kaajjite sufa noose yinoonni.
Dooggate latishshi, rosu, fayyimmate, loosu kalaqo, gorsu latishshi loossanna labbinori qoqqowoho danchu garinni gumulantanni noota gaamo buuxxinoha ikkanna; mootimmatenna paartete tantanono kaajjado ikkasenni qoqqowunniha kalaqamunna mannu loosino jiro garunni horoonsi’ne konninni roore loosa agarrannita gaamo huwachishshino.
Qoqqowu pirezidaantichi Desta Ledamo isi widoonni; seyoote iillinoommo loossa kaajjinshe sufisiisatenni la’noonni xe’ne womshate loonseemmo yiino.
Hanafante gooffinokki loossa keenatenni harancho yanna giddo gumulantannonna qooxeessa hala’ladunni latisate hajo la’annonsa bissanni ledo qinaambe loonsanni hee’noonnitano qummeessino.
Gaazeexu Odeessaanchinni
Bakkalcho Badheessa 19, 2016 M.D
