Addis Ababa: Jaapaanete mootimma Sidaamu Qoqqowi Bilaatte Gaangaawi Woradira 100 kume doolaarenni Baleelu Layinki Dirimi Rosi Mine halashshate pirojekite hanafisiissu.
Itophiyaho Jaapaanete Ambaasaadderchi Shibaata Hiroonoor, pirojekite laise uyno xawishshinni; Jaapaane Baleelu Layinki Dirimi Rosi Mini halashsho pirojekitera 100 kume doolaare fulo assitannoha ikkanno.
Pirojekite Jaapaanete ‘‘Grant Assistant For Human Security Project’’ loosantannota ikkitanno yiinohu Ambaasaadderchu; 3 kume ali rosaano horaameeyye assitannota xawisino.
Halashshote pirojekkitenni hasiisanno uduunni wo’minosiha mitto ijaara (fooqe) minnanniha ikkanna; kunino baxxinohunni meyaa rosaano woyyino rosu qarqarira rosanno gede assannonsaho yiino.
Jaapaanete mootimma Itophiyaho babbaxxitino irko assitanni keeshshitinota qummeessinohu Ambaasaadderchu; illacha tugge loossanni keeshshitino handaarra mereerinni mittu rosu handaara ikkinota xawisino.
Rosu gobbate safote. Tini halashshote pirojekite woyyino rosu qooxeessa kalaqqannonna haammata rosaano rosonsa harunsitanno gede jawaachishshannote yaanni coyi’rino.
Ambaasaadder Shibaata xawishshi garinni; Jaapaanete mootimma Itophiyaho baadiyyete olliira heedhanno qansootira dandaami deerrinni kaa’lo assitanni keeshshitino; aantete tenne dagoomu bissa kaa’late illachase baadiyyete qooxeessira assite loossanno hallanya uurrinshubba ledo halamatenni hala’ladda loossa loosate mixi’noonni yiino.
Tenne Pirojekite hanafisiisate Jaapaanete hattono wolootta Eezhiyu gobbuwa 16 kume ali suuqqa noo ‘Family Mart’ yaamamanno kubbaniyyi jawa kaa’lo assino yiinohu Ambaasaadderchu; kubbaniyyu rosu handaarira assanno kaa’lonnino gobbaanni qooxeessu teessaano bunu laalchira bobbakkannonna horaameette ikkitanno gede assitanno pirojekite hanafisiisate harinshote aana noota xawisino.
Kubbaaniyyunniti jajjabba loosu sooreeyye Baleelu Layinki Dirimi Rosi Mini rossanno towaanyo assansa xawisinohu Ambaasaadderchu; albillichono Jaapaanete mootimma ledo ikkatenni dancha hexxo noonsa rosaano kalaqate loossannota qaale eino.
Addisu Adoola
Bakkalcho Badheessa12, 2016 M.D
