-Qoqqowoho Ga’labbotenna keeru looso daganniha assine loonsanni hee’noonni
Addis Ababa:- Sidaamu qoqqowira Hawaasanna qooxeessaho noo jawu dhuki ledo taalannoha latishshu looso gumula hasiissannota Woxu ministirchi kalaa Ahimed Shide xawisi. Ministirchunni massagantinoti Federaalete mootimma harunsotenna irkote gaamo Hawaasi quchumiranna qooxeessaho gumulantanni noota latishshu loossa towaattino.
Ministirchu towaanyote gedensaanni coyi’ranni; Sidaamu qoqqowira Hawaasi quchumiranna qooxeessaho noo qarqartora gumulamanni noohu latishshu loosi jawaachinshanniho.
Quchumaho noo miinju dhuka, Federaalete mootimma widoonni ijaarantino babbaxxitino safote latishshuwa garinni
qooxeessu dhuki ledo taalinoha latishshu loossa gumula hasiissannota coyi’rino.
Quchumu jiro, biinfillunna lophote bue ikkitinota Hawaasi qacce latisate gumulantinori hanafote loossa heedhurono Garbu qacce latishsha kaajjisha hasiissanno yiino.
Hawaasi Pooli Tekinikete kolleeje harammaadda, mereerimunna seeda yanna qixxaawonni kumunni kiirranni rosaano qajeelsitannota la’’ansa xawisino.
Adaare Hospitaale halashshatenna Adaare rosu mini ijaarshi fayyimmatenna rosu handaarinni towaatantino loossa ikkitanna ijaarsha rahotenni jeefinse owaante aa hanaffanno gede massagaano hasiisanno illacha tugge loosa hasiissannota huwachishino.
Quchumaho afamannoha ‘‘Super Ova’’ Quuphu ijaaranna labbannore jajjabba ijaarra jawaachisha hattono Hawaasi Industirete paarke kaa’la hasiissannota coyi’rino.
Qoqqowu pirezidaantichi Desta Ledamo isi widoonni; qoqqowoho gobboomitte latishshu mixo kaima assine babbaxxitinota latishshsunna danchu gashshooti loossa loonsanni hee’noonniha ikkanna; dagate mittoo’ma kaajjishate illachinshe loonsanni hee’noonnita kulino.
Qoqqowu keere ikkara dandiinohu ga’labbotenna keeru looso daganniha assine loosankenniiti yee; keerunna ga’labbote looso ga’labbote amaale mine Federaaletenna qoqqowu ga’labbote uurrinshuwa ledo ikkatenni qachu qoqqowira nooha ga’labbote akata yanna yannatenni keennannita xawisino.
Gibrinnu widoonnino qoqqowoho noota ruukkado baatto gummaamo ikkino garinni horonsirate gibrinna yannaasincho assine loonsanni hee’noonnita xawise; adote saada, saada misiisa, lukkuwu, diishshote, qulxu’mete laalchinninna kirrete da’muulchi latishshinni qoqqowoho illacha tunge loonsanni hee’noonni yiino.
Maatete jireenya lainohunni pirezidaantichu kalaa Desta xawisanni; laooshshu soorro abba dandiinoonni yee; konninnino maatete jireenyi loosi sokko hendoonni garinni gumula dandiinoonnita xawisino.
Hawaasi quchumi kantiiwi kalaa Mekuriya Mershaye isi widoonni; harunsotenna irkote gaamora sette aganna jeefishshi ripoorte shiqqeenna keennoonnita xawisino.
Gaamo ripoortete gobbaanni loosunni gumullanni hee’noonni loossa towaattanni noota xawise; towaanyo gummaamma loossa sufisiisatenna foonqe leeltinowa taashshate kaa’litannote yiino. Guma borreessiinsoonni latishshu loossa heedhurono quchumaho noo kisaminokki dhukinna jiro garinni loosama hasiissannonsa haammata loossa hee’ransanni roorsine loosate qixxaamboommo yaanni coyi’rino.
Baajeetete dirinni 12 kume qansootira loosu kaayyo kalaqate hendoonniha ikkanna sa’u sette aganna giddo 9 kume ali qansootira loosu kaayyo kalaqantinota qummeessino. Goshooshantinoti Adaare Hospitaale halashshatenna Adaare rosu mini ijaarshi loossa harancho yanna giddo jeefisate quchumu gashshooti illacha tuge loosanni afamannota kayisino.
Towaanyo assinoonniri mereerinni Yaareedi addi addi maashinnanna soorrinanni uduunni Injineringe anninna safaanchi kalaa Yaareed Isxifaanoosi coyi’ranni; mootimmate massagaano ijaarra towaatansa jawa kaa’lo assitannota xawise, towaanyote loosu harinsho aana xaadannonsaha gobbayidi woxu soorro qarra gatisate dandiisiissannonsa hedo afiransa coyi’rino.
Gaamote miilla Hawaasi Pooli Tekinikete kolleeje, Industirete paarke, rosu, fayyimmate uurrinshuwa lendanna jajjabba Investimentete loossa towaattino.
Gaazeexu Odeessaanchinni
Bakkalcho Badheessa12, 2016 M.D
