Addis Ababa: Abbay kofatto Caabbicho burqisanno ijaarshi lamalu agani giddo gumulamannota pirojekitennihu qaru loosu harisaanchi Injiner Kifile Horo egensiisi. Abbay way aana loosamanno buusinna pirojekitennihu wo’mu loosi aananno diro gumulamannotano qummeessino.
Pirojekittete qaru loosu harisaanchi Injiiner Kifile xawishi garinni; barra hashsha loossanno pirojekitete loosaasinenni kofattote ijaarshi sivilete loosi 99% gumulamino.
Qara kofattote kifile 107 miliyoone meet-kiyube konkiriitete wonsho amaddanno gede coyi’rinohu qaru loosu harisaanchi; konni mereerinni xibbuunni 1% calla gattinota xawisino.
Kofattonniti elekitiro mekaanikete baxxino garinni Terbayinetenna Jenereetere qasate loosi 78% gumulaminotano coyi’rino.
Mitte mittenti 375 Meega waatte korreentete wolqa burqisate dandoo noonsari lame Terbayne yunitta babbaxxitino yannara qasamase qaagiissinohu Injiiner Kifile; gattino korreente burqissanno Terbayinna aantanno agannara qasantanno yiino.
Haammata jifonna xiiwo gufissusikkinni sufinohu kuni ijaarshi harancho yanna giddo Caabbicho burqissanno terbayinna looso gumulate sharro assinanni afammanni yaatenni odeessino.
Kofattote waa sayissanno ashandubba ijaarshi 85% ale iillinota Injiiner Kifile qummeessino.
Kofattote korreente fincate ijaarshi lamalu agani giddo gumulamannoha ikkirono; Abbay way aana loonsanni buusinna xaphooma pirojekitete loossa aananno dirira wo’munni wo’ma gumulantanno.
Xaphooma looso 2017M.D gumulatenni Itophiyu daga wo’mate naaxxille ikkitino Abbay kofatto jeefo gansiisate hasiissanno sharro assinanni hee’noonni yiino.
Pirojekitete ijaarshi Itophiyu uurrinshubba isilanchimmate baraaraancho ikkasinni ijaarshu harinsho loosaasinete beeqqoranna xaphooma kofattote ijaarshira irko assitanno bissa baalaho ledote wolqa kalaqanno gede xawisino.
Itophiyu Caabbichu Wolqa Abbay kofattora kaa’lonke shotu garinni fula dandiisiissanno www.mygerd.com yinanni dire-getse faajje assase qaangannite.
Kofattote ijaarshi Badheessa, 24/2003M.D safote kincho tungeenna looso hanafinoti qaangannita ikkitanna; ijaarshunnihu 13ki diri aantanno muli barrubba gidoo iibbadu manyootinni ayirrisamanno yine agarranni.
Addisu Adoola
Bakkalcho Badheessa12, 2016 M.D
