Toonsile woyi kokkerichi mujja Kokkete guranna qiniiteenni afantannori lame mujjja ikkitanna addi addi baakteeriyubbanna vayiressa mannimmanke giddora e’annokki gede gargartanno.
Mannimmanke dhibba gargadhate dhuka lossitannota waajjo mundeete seellano kalaqqanno.
Tini mujja uminsa hadhaabbanno woyte Tonsile yine woshshineemmo xisso kalaqantanno. Baakteeriyunni woyi vayirestenni kalqantannoti toonsilete xisso toonsilete mujja darshiishatenna kokke hangaarate malaatta afidhino. Xisso mite mite yannara foo’la hoogate malaatta afidhino.
Toonsile hiikkunni diru deerri giddo kalaqantannoha ikkanna; qaqquullunna aju wedelli aana kayinni roorenkanni rosantinote.
Toonsilete woy kokkerichi xisso malaatta
- Kokkete xisso
- Sagale egemmate qarri
- Huurote soorrama
- Bushu foo’late gara
- Maccate xisso
- Iibbabba
- Umu damuumenna w.k.l…
- Kokkerichi woy toonsilete xissora addi addi xagga adhatenni gargadha dandiinanniha ikkanna; duucha woyte mini giddo qixxeessinanni coyubbanni shotunni xagisa dandiinanniti anfoonnite.
- Waayi giddo Maxine worre afoo lulluqata, afoonna kokke gawajjanno baakteeriyinni co’eessatenna toonsilete mujja qooxeessira wole madi’ra kalaqantannokki gede kaa’lanno;
- Gummate laalo huuncamme sasenna onte barrubba geeshsha adhatenni dhibba gargadhate dhuka lossatenni hiittenne mada gargadhate kaa’lanno;
- Shiishshannonna makimaano batidhino sagallanninna agattonni xeerti’ra kayinni qarunni hasiissannote yinoonni.
- Toonsilete xisso mini giddo xagisate kaa’litanno hayyo
- Malawo
- Mitte birciqqo waayi giddo shoole maanka malawo, bocu boci maanka maxinenna loomete huuncamme karsiisatenni barrunni lamenna sase hinge aga dancha woyyaambe abbitanno.
- Barbarenna irde
- Mitte birciqqo gafantino ado aana shiima irdenna barbare worre karsiisatenni goxanote albaanni aga xisso woyyeessitanno.
- Kaaroote, qaysirenna kukembere
- 300g kaaroote, 100g qayisirenna 100g kukembere mitteenni daanke huuncamme qixxeessine horoonsi’ra wole xissote malaho yinoonnireeti.
- Loome
- Mitte loome lamewa bande Maxine giggishshine huuncine aga danchate yinoonni
- Jaanjiweelo
- Jaanjiweelo huuncine gammuutino waayi giddo worre hasiisiro mitto maanka malawo wora dandiinanni; konni garinni mittenna lame hinge lulluqatanna jaanjiweelo shaete giddo worre agano wole doorsha ikkitanno.
- Duumo Tuma
Duumo tuma daanke gammuutino waayi ledo karsiinse afoo lulluqata xisso woyyeessate kaa’lannota kulloonni.
Xaphoomunni aleenni xawinsi hayyo horonsi’neenna xisso woyyaawa hoogguro fayyimmate uurrinsha marre hasiissanno buuxo assi’ra hasiissanno.
Bakkalcho Ammajje 21, 2016 M.D
