Elekitirolayitubba mundeete, munyuuqqate giddonna babbaxxitino bisu kifillara afantanno shiilubbaati.
Horonsa?
Bisu giddo daadaanotenna shiilote bikki taalo ikkanno gede assitanno /kunino 2/3 munyuuqu giddo hattono 1/3 qole munyuuqqate gobbaanni ikkanno/.
Mayira?
Bikkunni sa“ino way munyuuqqate giddoyidi kifilera kuusamannoha ikkiro nigga dhookkara dandiitanno; hattono haammatu way bikki munyuuqqa qoliro munyooqqa suudensa hoogatenni daadaancho amadate dhukinsa ba“anno. Bikkunni sa`ino daadaanonna shiilubba bisu giddonni fula tenne taalchimma sarraaqanno. Rosamino garinni bisinke dandaamiro konne taalchimmate qarra umisinni biddi assate wo`naalanno. Ikkolla ikkinnina mite mite akatubbanna xagga dhuku aleenni assitasira dandiitanno.
Hiitto?
Keeshshinonna kaajjado ikkino tushshiishanna godowu fushsha, bisu hunkii batira, giiramonna danote mada bisu kaa`liweelo daadaanotenna shiilubbate bikkasi agarate mitiinsitara dandiitanno.
Ledotennino bisu daadaanotenna shiilubba bikka agarate calla ikkikkinni bisu daadaano asiidimmate bikkano qorqorate horonsi`rannonsa. Hiikko raginnino noo bikku sarraaqama bisunnita dhaabbanno shiilubba hunatenni keeraa`minoha biso looso sarraaqara dandaanno.
Wolootta horubbana?
Ledotennino elekitirolayitubba shiilubba munyuuqqa e`anno gede, bisu giddonni fula noonsa coyibba garunni fultanno gede, munyuuqqa sokka garunni
sayissanno gede hattono surrenna wodanu loosonsa garunni fultanno gede kaa`litanno.
Elekitirolaayitubbate bikki taala hooga maa gawajjara dandaanno?
Macciishshamme agadhate, foo`late gara, wodanu gana, bisu dhuka, surrete looso garunni gumalatenna labbinore gawajjanno.
Elekitirolayitubbate bikki sarraaqamara qara korkaatta maa ikkitara dandiitanno?
Babbaxxitino xissuwanni woy bisu du`mille rahotenni ajishate yaannohunni adhinanni babbaxxitino xagganni kalaqamanno kaajjadu tufinna godowu fushsha, sagalenna daadaancho ikkado bikka adha hooga, bikku aleenni ikkino bisu hunkiinni, babbaxxitino xagga irkidha ka`anno /kaanserete xagishsha lede/, saga`late fayyimmate qarrubba, helleete, mulunna wodanu fayyimmate qarrubba wkl…
Maa assa hasiissannonke?
Fayyimmate ogeeyye xaadde; kuni fayyimmate qarri xaadino`neha ikkiro buuxidhe, hakkiinnino hajo la`annonsa addi addi fayyimmate handaari ogeeyye ledo xagishshu aana mitteenni loosse.
Bue:- Keebiroon Sennay: sagalete amnyooti xagishshi ogeette
Bakkalcho Ammajje 14, 2016 M.D
