Annuwinkenna akaakkanke Adiwa olante,mundeensa dunte,miqichonsa cancante hattenne basera leelte kakkalante abbitino. Ninke ilama kayinni qaagganni heedhanno. “Adiwa Qaaga hooga akkaakkanke miqichinna mundee aana haa’riimate” yaanni IFDR xaphoomu ministirichi Abiy Ahimed (Dr) Adiwu qaaggo Muziyeeme maasso aana coyi’rinoti hegere halaaleeti.
Ee,tini ilama “Adiwa Adiwa”yitanni Ammajje 23 ayirrissanna tayixe 128 diri qaaggote barr lame lamala gedensaanni qaagame hosannoha ikkanno.
Adiwa afuunni calla qaanganni hee’nanniha ikkannokki gede kuneete sumudinsoonni. Addis Ababaho qaru quchumira Piyaassaho Adiwu dhagge mucuqqi assite kultanno muziyeeme uurritino. Tini muziyeeme Adiwa afuunni calla ikkikkinni amammandanni doninni hattono latishshunni leellinshannita ikkite uurritino.
Adiwu qeelle wolambinatu lawishshaati. Mishe dayino allagga irraawinsoonni xirchinna gaari malaateeti. Xaaleenu kadote gashshooti wolqa xawoho irraawisatenni; farcote, wolaphotenna di kadammeemmo yaate noo kaajjille kakkalamatenni kaajjinshoonni malaateeti. Konninnino techo kalqete deerrinni wolaphote caabbichonna malaate buuxissino dagaati Itophiyu daga.
Itophiyu daga hiittenne ikkito goddo heedhurono; giddoonni babbadamooshshu foonqe heedhurono, gobbate hajora kayinni mittimma noonsa gede; gobbate ayirrinyira reyaa, borojjimmatenni erote eronni woyyitannota, xawoho muxxe ikkitino lubbonsa kakkalte borreessiissino gutu dhaggeeti Adiwu qeelle.
Qeelle duuchante daganke beroo gutu kakkalama dhagge calla ikkitukkinni,hakkiinni roore techoo gutu dhaggenkera safote. Dandiineemmo yaanno baqqeenyinni ilama diru dirunni la’’ate hasidhanni keeshshitino jiroo’mitino Itophiya kalaqate sinqe ikkitannotano ammannanni.
Qeelle macciishshiishino duduwi, kadotenna shettote borojjimma giddo heedhanno dagara ille fantinote;wolaphotenna farcote raaratenni daafurtino dagara haaro hexxo kalaqqino. Fuggoote giddo heedhanno ayimmara meessa ikkate xa’mo ka’’o kalaqa dandiissinonna baqqeenya kalqete kalaqqino ikkitooti.
Tini qeelle kalqoomu deerrinni wodana goshooshshinote. Xaa yannara jawa base uyinanni hee’noonninna albaaggeno qaanganni hee’nanni Adiwu qeelle qaagate, Adiwu qeelle qaaggo Muziyeeme ijaara; qeelle woyyaawino daninni qaagate jawa dhuka kalaqa dandiissanno.
Muuziyeeme xa yannatano ikkito dagganno ilama qeellete dhagge calla ikkikkinni, qeellete badheenni noonna qeelle kalaqqino gutu gobboomitte mittimmanna dhagge huwatte, tenne albisa dhagge annuwanna amuwa ikka kalaqqara dandiitanno dhagge loosate ayyaana beeqqitanno gede woyyaabbino kaayyo kalaqqanno.
Qaaggote muuziyeeme, Adiwu qeelle odeessishshi kadotenna miiccote gashsho tiyyidhinore, wolaphonsaranna taalo farcora hexxonsa wirro muqaaqqino; fugantino ayimmaranna xa’mora dawaro qolatenni sa’e kaote caabbicho ikkitinote. Kalqete aana fuggootenni sa’ino gobbuwarano dhaggensa bisooti. Konni daafira tini muuziyeeme, hexxote kaajjille, cinca, hembeelantannokki bareende hegeraamo assitannote.
Muuziyeeme, dhagge bikkino deerrnni ijaaramase, mootimma dagate mittimma dhagge noo luphiima ayirrinye loosunni leellishshinote. Ilama dhaggensara mule ikkitanno gede assate widoonni woyyaawino ga’a gaabbotenni loosa dandiinanni gede baqqeenya kalaqqannote.
Gobbate gede xa hee’noommo dhaggete eramme,roorimankanni babbaddanno dhagge giddonni fulle, gutu dhaggenke halashshatenni lattino gobba kalaqate ilamate gede hananfoommo soorrote millimillo seekkanno gede jawa dhuka ikkatenni owaata dandiissanno muuziyeemeeti Adiwu muuziyeeme.
Mootimma dhaggete shokkimma gobbanna daga baca waaga baatisiisanni noo yannara; dhagge halaale naqqassanno doogonni qaagate hananfoonni sharro jawaachishshannote Adiwu Muuziyeeme. Konnira mootimma assitino sharrro addintanni naaxxissannotenna albaaggeno togoo dhagge suffanno loossa sufisa hasiissanno. Adiwu dhagge annuwanna amuwa ikkitino albi annuwi mittimmanna mixo kaajjilli dhagge ronse qarrissanno yannara konni gedensaanni hasiissannokki kakkalama baantikkinni sa’’ate Adiwu muuziyeeme mitto lawishshaati.
Adda lawannokki addanna,qeellanni yinoonnikki qeelle annuwinkenna akaakkanke hiittoonni abbitinoro leellishshanno Adiwu Muuziyeeme qeellete dhagge ilamate sufisate sumudaati!
Bakkalcho Ammajje 7, 2016 M.D
