Gaalu daddalaanchi dikkote hirantara shiqqino Gaalubba mereerinni mittu lowontanni wodanasi adhinohura hirannohu ledo yekkeero hanafi. Hidhaanchunna hiraanchu mereero baca xiqqeessubba adhino waaga dirrisienna didirriseemmo yitanno yekkeero assinihu gedensaanni hidhaanchu waagunni sumuu yee Gaala hidhe minisira ha’ri.
Gaalu daddalaanchi minisira iilliti soqqamaanchosi woshshe Gaalu koora dirrisanno gede kulannosi. soqqamaanchuno gaalu koora tiranno woyte kooru woroonni shiima mito gurdamino ogoro afi`ranno. Tire la“anno woyte ogoru wudde ikkitino almaazete shiilonni wo`mino.
Soqqamaanchuno “mooticha! Hidhootto Gaali baatooshshiweelo haa’re abbino atoote la“i!” yaatenni hagiirrunni wo`me raari. Daddalaanchuno soqqamaanchisi hoowi aana arrishshote caabbichinni xabbannore almaazete gumma la“anno woyte lowontanni maala`li.
Ikkollana “Gaala ikkinnina almaazubba dihidhoommo. Xaanni ayiddeho qola nooe” yii daddalaanchu. Ashikarchuno “makkino mootichaati kuni?!” yaanni wodanisinni hasaawihu gedensaanni “hiikku manchino almaazubbannita halaalaancho ayidde afara didandaanno! yee coyi`ri.
Ikkollana daddalaanchu tenne amaale adha giwe yanna hunikkinni almaazete ayidde hasate dikko wirro hari. Lowotano daafurikkinni gattino gaalubba hirate dikki’raano agaranni nooha Gaalu hi`raancho afi`re hakkonne shiima ogorcho qolisi.
Gaalu hi`raanchino lowontanni hagiidhe “lowo geeshsha wudde ikkitino shiilubba`ya kooraho woroonni maaxa`ya deamoommonkanni. Xa baraarsha ikkannohe gede ogoru giddo noo almaazubba giddonni illete tashshi yiinoheha adhi! yii.
“Amadoommo woxinni dancha Gaango hiroottoe. Ledote baraarshano diadheemmo” yii daddalaanchu. Hidhaanchu baraarsha diadheemmo yiirono Gaalu daddalaanchi kayinni adhanno gede huucca hanafi.
Jeefoteno hidhaanchu osolunni wo`me “ogoro qolammohera mudhummo woyte lame lowontanni ayirritino almaazubba umi`yara gatisi’roommo! insanni roorino baraarshi dino!” yiisi.
Gaalu daddalaanchi hidhaanchu qaale macciishshanno woyte lowo geeshsha caaccaawe ogoru giddo noota wuddenna ayirritino almaazubba hoccu aana fince kiira hanafi. Ikkollana kiire gudihu gedensaanni hagiirrunni wo`me “ogoru giddo noo almaazubba mereerinni mittuno dixe“ino. “Hiikkuriiti muxxe almaazubba umi`yara gatisi’roommo yiittori?”
Daddalaanchuno naaxxillunni wo`me “anewa gatisoommori wudde almaazubba ammanamooshshe`yaatinna umi`yara nooe ayirrinyeeti! yee qolisi. Hiraanchu macciishshino coye ammana hoogatenni illesinni daddalaancho geeqate gobbaanni dawaro aara didandiinno.
Baalunku umonke la“anna hakkuri wudde almaazubba giddonke noota buuxi`no. lamentinni wudde almaazubba noosihu hiikku manchino kalqenkeha dureessa manchooti. Ayeti ani lamentinni wudde almaazubba nooe yaannohu? Hanni baalunku meessanke tenne xa`mo xa`mino. Dancha barra ikkonke!
Abbebech Maatewoos
Bakkalcho Arfaasa 30 / 2016
