Qaaqqu: Haaroo`mate Kofatto ledo xa’mo noonke yitanno gobbuwa Itophiya garirinnino gariweelunnino jaddaasincho assite kayissanna macciishshinannihu; hakko iso dandaantunsa bikkinni baala Itophiyu horaameessimma hoogissanno loossa giddo beeqqo assitannanna afidhu tunconni Itophiyu murci’raanchimma effidhanna macciishshinannihu isi mayiraati?
Annu: Jaala ate! anehu worbu woraamu qaaqqi! hashshu ballo! hada gobbakkire hegersa hanafoottoe; hakkiinnino sa’e gobbanke Itophiya bunshetenni hettissanno diinna bade afate geeshsha iillitoe; hakkuyinkuraati tenne ate geeshshihu 12 diri qaaqqiwiinni agarrannikki kayinni hixamanyinanni xa’mo xa’moottoehu; hi’’i ballo ninke Itophiyunnire ila maatekki riqiwatennino sa’e gobbanna dagakki riqiwate geeshsha iillootoena; maahoyyena kuleemmohena qaxaqa’a yite macciishshiexa.
Eewana, 86 xibbuu anga aliti Nayli lagi dilaali nooseta Itophiya waayinni horonsi’rate qoosso dinohe yitanni afidhu tunco baalatenni uurra ofolla ho’lituha laweennansa gunguntanno. Gurchotenni mittuno waayi dilaali hee’rinsakkinni Abbay way hojjitte horaameeyye ninkeeti yitanni sanunni sanu geeshsha mikitansa duudhe, hinkonsa ga’midhe ayyaayyantanno. Qaaqqu anehu, ise calla yaatto hakko garinnino Itophiyu baaru furcho afi’rate harunsitanni noo doogo bushiishatenni sainohunnino duumu baari ledo faro xaaddannokki gobbuwa baaru furcho afi’rate qoosso dinonsa yaanno uurrinshi xawishsha fushshatenni Itophiyu gobboomu horaameessimma hossi yite uurritanno.
Qaaqqu: Anna’ya afiikkiti ba’oonkehe yaanni tenneetinkunni babbaxxitinota Itophiyu Pireesete Uurrinsha gaazeexuwa nabbawanni afi’roommo mashalaqqe garinni kuri Itophiyu horaameessimma gibbanno gobbuwa ‘’woshshinikkinni yee’’ yinoonnihu gede ikkitinoti ayeerano xawo ikkitannota labbannoe.
Sorummoro amadattoena Itophiyu dagase mittimmanninna mootimmase murci’raanchimmanni hattee labbinota kalqete dancha utuwimmate dandoo xawishsha, lophotenna jireenyu lawishsha ikkitinota abbay Kofatto ijaarte jeefisse diinu beebba looso tire shaalanni hose gale tae ba’’anno hamashshaambete kaphira fule daafuro, irraambenna saala duqqenna tirfire umo duwanno gede assitinoti baaru furcho afi’rate xa’mo shiqishirano afi’rano qoossoseetilla. Maahoyyena anna’ya baaru furcho yinanna babbaxxino tuqu xaadooshshinni macciishshoommoha ikkirono isi ‘’Baaru Furcho’’ yaa maatilla? maricho loosi’nannirichooti —?
Annu: Hashshu ballo qaaqqo’ya, mashalaqqete harunsatenna xunsate ati xaa oosonni woyyoottoho; nabbawatto daafira. Baaru furcho yaa Itophiyunni gobbaydi gobbuwawa loosi’noonni laalcho lawishshu gedera bunu gedeere sonke gobbaydita woxu eo/soorro afi’rate hakko laalcho baaru aanaanni jawa uduunne hoggobbanno yowolonni hogonmbe soqqate baaru aana assinanni hodhishshi base woy baaru aani doogoti. Hattono gobbaydinni gobbate giddora, gobbankera afamannokki/ laashshinannikki (lawishshaho:-maashinete gedeere jajjabbaannanna batinye uduunnenna laalcho meessita baaru aani doogo kalaqi’ne eessi’rate ha’rinshooti; qoleno horosi la’nummoro konni albaanni Itophiyu umiseta baaru furcho hoogasenni uduunne gobbara fushshi’ratenna giddora eessir’rate yite baaru furcho noonsarira owaantete baattanno baatooshshi hakko uduunne hidhinihunni diajanno, mito woyte isinni roorikkinni digatanno. Konni daafira, umiseti baaru furcho heedhusero konne wolootaho baattanni owaante afidhannoha quwa saino baatooshshe gatisannosehura horaameette ikkitanno yaate. Ajo batiro xa xawihekkinni digatino lawinoe, qaaqqo’ya! Hakkiinni sa’inota wole woyte lede tittire kuleemmohena jawaatie!
Qaaqqu: Hi’’i ballo anna’ya! Ateha ikka hoogoommora gaabbe hoogummo! massinanni hige ila maate baalanti oosonsa gobbansa jironna jireenyi daafira konni garinni hedo cu’mishiishanni lossitoommero halcho’yaati. Ani kayinni tenne huwachishittoeta rosi’ya minion ikko kifile’ya miillara huwanyo beeheemmo. Jeefote mitte yaa hasi’reemmoti kayinni maati yiittoro ayee gedeno ikkeenna Itophiyu daga tenne baaru furcho afidhanno; korkaatuno ‘’keeshshannollana annisi moogira xoshshi’rannokkihu dino’’ yinnoonninte gede tini cu’mamino korkaata afidhino xa’mo techo umosi higa hoogguro nafa, Xaphoomu Ministirchinke Abbiy (D/r) yiinte gede, ninke iillineemmo woyteno ikkiro dawarose higgukkinni digattanno!!
Anna’ya afoommokkire afisiisoottoehura galaxxeemmohe, baxeemmohe, utuwa ikkite hee’rie!!
Demmellaash Demmeqe
Bakkalcho Dotteessa 30, 2017 M.D
