Muli yannaraati; mittu rosaanchira shiima labbanno mitiimma xaaddeennasi tini mito woyte shota ka’a woyte kayinni dancha teedanna fojo labbannasi maaxi’re keeshshi gedensoonni hashshe soodi kiiro banca’e batidhanninna busha buutaame gede bisu bitimira fincante shetisseennasi maaxi’rannohura aleenni ikkite albu geeshsha fulte gadachitusi.
Hada tini mitiimmano mitte kifile rosaancho ikke hee’reenna hanaffinosi musooti (rosu muso). Xa kayinni isi 12 kifile jeefote fonqolira qixxaawanni noo yannarano gamunni gama ikkiturono tini mitiimma harunsitannisilla no; sa’e sa’eno miliqqi assitannasi bire umo musi’ri yannano gaabbotenni qaagiissitanni qarrisseennasi tenne tidhanno gara hooge jaalisiwa/ miilisiwa (bilchaatu rosaanchiwa) mare amaa’lino amaale konni woroonni noo hasaawinni shiqinshoommo’ne.
Musamaanchu rosaanchi: Koo, jaalu anehu; keerella keeshshittoe? heeshshona hiissitinohe?
Bilchaatu rosaanchi: Kaaliqira galatu iillosi; keere baraaraholla; dayoe bushshu! ati hiittooti? konne ofolli! hii’’i tenne rosu kaajjishshi xa’muwa nabbambbanninna wo’naallanni hakkiinni sa’uta hasaambeemmona; kayinni maricho kaa’lohe; tenne culkaame yannanni baxxinohunni 12 kifile rosaanora shiqinshoonni hurbaati xiltu giddo qiida geeshsha nafa yanna hoogge uffi-qocci yitanni noo yannara keerunkunni dayootto?
Musamaanchu rosaanchi: Eewanni yaattontena ani dayoommo hajo kayinni hakko hurbaate chuucceenna kokke mare miqilaallanni dirra giweennae amaa’lammora yee muxxe ikkitino yannakki aaninni shiima xiqqeessa foocce hedo aattoera hasi’reeti.
Bilchaatu rosaanchi: Hay hunsha bai! ‘’xeena gane kaeenna xee’no annikki’’ yinnoonnina ifichunni mayira dirrisi’rate wo’naala gibbe keeshshittoyya; techo saada xo’anni noo yannara ani wole agurreenna ificho nafa fooceemmohekki gede shiishe bainona may woyyannoro atinni yaattori nookka…?
Musamaanchu rosaanchi: Maayye hatteeno digiweemmo; shiishirono kokkete miqilaallinoeha dirrisa dihoogannoena hige hakkiinni sa’inota assattoekki gede aninni mixira hooge ruukkisi’roommona hanni ballo noosihunni irkisinoha fokkifatinoho diyinannina dandaamihere hiixatie, jaalu anehu.
Bilchaatu rosaanchi: Maayyena mullu afiinni fiqiiqichu woyyatena togo assattokka: xaate baadu hawarrino, kayinni dihashshino; afannohu xaano afanno; hambohu kayinni techo barra gumula dandaanno coye ga’ara yaanno; musokki biso assidhukkinni yannantenni sissinoommero may bai; muso anfanni hee’ne ga’ara yaa ga’annino sa’e albillichote dhaambe deisiissanno.
Hanni, ‘’xaate barru meddi yino daafira woy di’’iilleemmo yitannota laafootu bidhatto koysate giddonni fulte’’ tenne jeefote fonqoli lawishshira qixxeessoommota udumitte xa’muwa hixamanyetenni nabbawatenni umokki sissi, woy dhaaddo ikkitino rosaano ledo xa’monna dawarote amuraate qixxeessidhine mimmito sissate noo’neta tenne muxxe yanna wo’munni wo’ma horonsidhine xawa gibbe shettissuhetanna leeltino soorro aana amaalamate dagganno lamala tenne sa’’aatenni kowiicho xaando.
Dancha nabbawe hegersatenni fonqoloho qixxaawate yanna ikkito’ne/ikkitonke! keerunn!
Musamaanchu rosaanchi: Masseemmo hige, taagalla atente gede nabbawoommoro woy atewanna ate gedee rosaanowa shiqe tenne mitiimma yannantenni amaa’loommoro kawoote atente gede wo’mu wodaninni fonqolamate bashshi yuummokkinni qixxaawannii agadheemmonkanni.
Ikkollana kayinni yiittonte gede xaano ikkiro dandaamie deerrinni ate amaalenna irko gama rosu danuwa aana nafa gumulummoha ikkiro dancha guma abbeemmo yee hexxeemmo.
Hashshu ballo, assoe bushshu! Maganu egennokkinna danchummakki lede halashshohe, batisohe! muso’ya garunni sissoottoetera addinta galaxxeemmohe!
Demmellaash Demmeqe
Bakkalcho Onkoleessa 7, 2017 M.D
