Cirata kokkete mereero “Ihi! Ihi!” yitanno qoonqonni kalaqantanno huurooti.
Cirata Sidaamu Daga hundinni hanaffe ilamatenni ilama tareessitanni abbitinonna techono dagate giddo danchu amanyooti xawishsha assine adhinanni ikkitooti.
Cirataahu ayeti? mamootenna mayra cirantanni?
Cirata meessa egensiisate, xawisatenna ayirrinyu malaateeti. Ciratannohuno jajjabba manna ikke; labbaaho. Minaanni ha’rinowiinni qaesi higanno woyte, wole qae wosinimma marranno woytenna ha’ranni hashsha doogote ciratanno.
Minaanni ha’rinowiinni higanno woyte nafara iilliro rahe minira handuruffi yee dieanno. Nafarira meddi yiiro cirata hanafanno. Ciratanni “keere hossinoonni? ooso saada keere hossino!?” yaanni Mitte Lame hige ciratihu gedensaanni minira eanno.
Minaamano ciratto aytero badde “keerella honsoommo!” yitanni dancha dawartanni mineenni doofaarinori hee’riro biddi assidhanno.
Minaanni nafara ciratanni taxxi yaannohu minaama mineenni doofaarinori hee’riro taashshidhanno gede yanna aate; qoleno busha gede ikkite ofolte noorono ofollo taashshidhara hedatenna qae daasi egensiisateeti. Kunino ayirrinye xawisannoho.
Wole, hashsha doogo haranni ciratanno. Hashsha doogo ha’ranni ciratannohuno tunsote giddo moychuno ikko mannu doogote nooro doogotenni ho’lannosi gede yaatenniiti. Tenne yannara “Ihii! ihii! Hakkurichi maati?” yee xa’manno. Manna ikkiro aneeti yaaranna doogotenni ho’lara; Moychono ikkiro doogotenni ho’lara ho’la hoogiro qaafo adhara.
Woleno, jajjabbu manni wosinimma manni qae mariro “Ihii! Ihii! yee ciratanni haqqa hiiqqe buko ganga’nanni Ayidde!, mini manna!, keereho!? Ooso,saada keereho?” yaanno. Minaanni qaete hee’riro, isi dawaranno. “Keereholla! Keere haa’rihu mannu mine no!” yaanno. Dayno wosinchi cirate keere haa’re minirano eanno. Minira e”e hajosi hasaawe kaihu gedensaanni “maahoyye xaate kaeemmo” yaanno woyte, “bunu fulanni no” yine gargarranni. Muddamino hajo heedhusi ikkiro fajjishiishi’re keere heedhe yee cirate fulanno. Gobbara fulanno woyteno qole xullote wolu manni daye eara noohu hee’riro fule kaeno ciratanno.
Minaanni qaete hoogiro kayinni minaama “keereholla!” yite keere haadhanno. Wosinchuno, keere haa’rihu gedensaanni, “hanniyya labbaahu huuro?” yee xa’manno. Minaamano “minaanni doogo fulino” yitanno. Wosinchino, “maahoyye! Higiro togoo manni daye hooge ha’rinohe yitine dhaansa iillishshe’e” yaanno. Ha’rarano ka”anno woyte minaama “minira die’nanniyya?” yitanno. Isino, “minira e’nannina isono afi’roommokki daafira ha’reemmo” yee ha’rara dandaanno.
Xaphoomunni, cirata meessa egensiisate, xawisate, fajjo afi’rate, ayirrinye xawisatenna amanyoote agadhate xawishshaati yaate dandiinanni.
Togoonni ha’nura ikkinonna biifado budu hornyuwa techo geeshsha reekkitunke annuwinkeranna akaakkankera galatu ikkonsa. Xaa dumeno konne hornya agara hasiissannonsata qummi assate banxeemmo.
Tenne borronna mashalaqqe bue Sidaamu Qoqqowi Woga Turizimenna Ispoortete Biiro, Fichee 2014 M.D yitanno maxaafichooti.
Addisu Adoola
Bakkalcho Arfaasa 23, 2016 M.D
