Anje oosote godo’le godo’likkinni saino yinannihu mittuno hee’ranno yine dihendanni. Godo’lete daninna akati qooxeessunni qooxeessu widira woy baadiyyetenna quchumaho babbaxxara dandiirono. Ooso deerru deerunninna qooxeessi qooxeessinsa garinni addi addi godo’le godo’litanno; mine, gobba, Saada allaalenniwanna babbaxxitino hedeweelchonni addi addi godo’le godo’litanni lophitanno.
Qoleno tini god’litanno godo’le qaaqquulleho hedate dandoo, dagoomitte ikkito, gedeninsa halcho, bisu jawaante afuunna shallagate dandoonsa boowirreranna mimmito godoshshiishate jawa qeecha afidhino.
Ooso qole qaaqquullu heedhe angansanni mitore amammaddanninna kikkissanni godo’la baxxanno. Lowo hagiirre afidhannohuno mitore amammaddanni godo’lituronna wolu manni bisonsa kikkisanni godo’lishiinshinsarooti. Wi’lanni noo qaaqquulle nafa ikkiro bisonsa kikkinse godoshshiinshinsaro wi’la agurte osoloho higganno.
Qaaqquulle bisonsa kikkinsanni godoshshiinshanni godo’le mereerinnino Mitte “Kicete”. Kice Sidaamu Daga baadillicho oosote godo’leeti. Tini godo’le roore anga shiimmammaaddu qooqquulli godo’litanno godo’leeti. Godoshshiishannohu kayinni diru deerrinni ikkikkinni; baalanka ikkara dandaanno. Godo’litanno qaaqquullino lowo geeshsha hagiidhitanno.
Tini godo’le hanaffinohu Sidaama ikkanna Lame seennu qaaqquullinniiti. Kunino bire Mitte manchora Lame ooso noose. Lamenti oososeno seenne ikkanna; bay’ranna maa’nete. Bayiriidite su’mi Soqqameeti; maa’niiditennihu qole Kiceeti.
Mitto barrano amansa dikko hadhanni Soqqame woshshite, “daayeemma geeshsha qaaqqoo’ya wi’litoonkenna qodoshshiishie; dayeemma woyte Daabbono abbeemmahena” yite dikko hadhanno. Qaaqqono ama dikko hadhu wido calla la”anni wi’litanni qarrissanno. Tenne yannarano Soqqame, qaaqqo Kice amadde “kice kawa higge lai” yituta Kice wi’la agurte ise la’anni oso’la hanaffanno.
Hakko barrinni hanafe Kice wi’litanno woyte rodoo ‘Kice’ yite godo’lishiisha hanaffanno. Qolteno “Kicee… amakki hiikka hadhino?” yinannihu qaaqqo Kice amase dikko hadhu doogo widira higge la’annota hawisiisateeti.
Tenne godo’leno godo’linanniha umise hummeessa (zeema) afidhinotenna qaaqquullu Lame Lame ikkite xa’monna dawarote garinni godo’litanno.
S:- Kicee!
K:-Yee
S:-Amakki hiikka hadhu?
K:-Dikko
S:-Maa abbitara
K:-Daabbo
S:-Abbituro aattae?
K:-Ee woy dieemmahe
S:-Aattaero kawa higi;aa giwattaero ka’a higi. Yaatenni kice amadde aate sumuu yituro isewa qolte hanqaffanno; dieemmahe yituro ka’a qolte xiibbanna godo’le osolunni gooffanno. Qaaqquulluno wi’la agure hagiirraamo ikkanno yaate.
Bakkalcho Arfaasa 16, 2016 M.D
