Gobbankera Sadaasunna Arfaasu agannara amma’notenna budu hornyubba afidhino ayyaanna ayirrisantanno. Baxxinohunni, Kiristinnu amma’no harunsaanonni iibbino garinni ayirrisantanno ayyaanna mereerinni Kiristoosi ilamishshu qaaggote (Gannu) hattono Cuuammete ayyaani kullannireeti. Kuri ayyaanna haammatu manni fule ayirrisannore ikkansara aleenni daa’’attote handaarinni noonsa qeechi luphiimaho.
Tenne yannara Itophiya dagganno daa’’ataano wole yannanni baxxino garinni kiironsa lexxitannoti anfoonnite. Konnira korkaatu, Gannunna Cuuammete ayyaanna ayyanaamenna budu amado noonsa amanyootubba harinsannire ikkansa kullanni.
Kalqete amammandannikki Dona ikke maareekkaminohu Cuuaammete ayyaani hattono Gannu ayyaana ayirrinsanni amanyooti gobbaydinni ikko gobbate giddo daa’’ataano timbiliqqe beeqqitannonna daa’’attannoho.
Kuri ayyaanna tayxe dirinnino iibbadu garinni ayirrisantanni afantanno. Sai Sambatu barra Gannu ayyaani iibbino garinni ayirrisame sainoti qaangannite. Baxxinohunni, Ortodoksete amma’note mininna Turizimete ministere wosinna adhite koyissani afantanno.
Kuri ayyaanna tayxe dirinnino iibbino garinni ayirrisananni afantannota lainohunni xawisinohu Turizimete ministere Dieetichi kalaa Sileshi Girma; ayirrisame sainohu Gannu ayyaaninna amandoommo aganira ayirrisamannohu Cuuammete ayyaani garunni ayirrisame gumulamanno gede Ministere loosu mini balaxote qixaawo asse loosu giddo afamannota kulino.
Lamenti ayyaanna amma’note hornyubba noonsare ikkansanni Itophiyaho babbaxxitino basera hala’ladunni ayirrisantanno. Konninni, Ministere loosu mini daa’’ataano babbaxxitino basera hadhe towaata dandiitanno gede daa’’attote base fano ikkite owaante uytanno gede assitanni afantanno.
Lawishshaho, Gannu ayyaani ledo amadisiisame Laalibalu quchumira haammata daa’’ataano hodhitino. Ayyaanu ayirrisame gumlamanno gara lainohunni quchumu gashshooti kantiiwinna amma’note minna gashshaano ledo balanxe hasaamboonnita Minister Dieetichu coyi’rino.
Sadaasunna Arfaasu agannara kiironsa haammata daa’’ataano gobbaydinni Itophiya dagganno yanna ikkase kule; qarunni Gannunna Cuuammete ayyaanna hooddise gobbate giddo daa’’ataano kiirono hakko bikkinni lexxitannota xawisino.
Ministir Dieetichu egensiisino garinni; lamenti ayyaanna wolootta kalqete gobbuwara hala’ladunni ayirrinsannikkire ikkansanni Itophiya dagge ayirrissanno daa’’ataano kiiro lexxitino. Ledotenni, xaa yannara roorima kalqete gobbuwa haaru diru soorro ayyaana ayirrissannonna fooliishshote yannansa ikkasinni Itophiya dagganno daa’’ataanno kiiro haammata ikkitinota coyi’ranno.
Ayyaanna korkaata assatenni gobbanke dagganno daa’’ataano babbaxxitino qooxeessubbara keeraatunni towaatte daa’’attanno gede ga’labbote ledo xaaddino hajubba bidhatto kalaqqannokki gede daa’’ataano dhaaddotenni woy onlaynetenni mashalaqqe afi’ea dandiitanno gede asinoonnitano xawisino.
Itophiyu daa’’atisiisate ogeeyye maamari miseessu pirezidaantichi kalaa Kibroom Tesfay isi widoonni; maamaru safaminohu handaaru ogeeyyenninna ikkado egenno noonsa ogeeyyenniiti yiino. Maamaru safaminkunni shoole diro kiirsiisinoha ikkanna; xaa yannara 250 miilla noosi.
Wocawaarunni Badheessu aganna geeshsha noo yannara Itophiyaho daa’’ataanote millimmo hala’ladunni la’nannite yaannohu miseessu pirezidaantichi; kuri mereerinni Gannunna Cuuammete ayyaanna qarunni kullannire ikkansa coyi’ranno. Diru dirunkunni gobbaydinni dagganno daa’’ataano kiiro lexxitanno gede assinanni hayyubba yanna yannantenni babbaxxitannota kayse; tayxe dirinnino maamaru addi mixo qixxeesse loosanni noota kulanno.
Itophiyaho mite mite qooxeessubbara kalaqantinota ga’labbote qarrubba ledo xaadinohunni daa’’ataanote kiiro ajjanno gede assitanno korkaatta heedhannokkinna qarunni ga’labbote qarrubba nookki qooxeessubbara hadhe daa’’attanno gede assinanni hee’noonnita coyi’rino.
Hiittenneno kalqete qooxeessubbara co’icha ikkino keeri no yine hendannikkita kulannohu kalaa Kibroom Tesfay; Itophiyahono daa’’ataano hobbatinsa agaramino garinni baxxinohunni Gannunna Cuuammete ayyaanna ayirrissanno gede maamaru illacha tuge loosanni no yiino.
Sa’u dirrara Sadaasunna Arfaasu agannara kiironsa luphiima ikkitinori gobbaydi daa’’ataano Itophiya daggannonkanni. Ikkollana, Koroonu fayya taraawo kawa hattono mite mite qooxeessubbara kalaqantanno ga’labbote qarrubba korkaatinni daa’’ataanote kiiro ajjinota kulanno.
Ikkirono, sa’u muli yanna kawa daa’’attote base egensiisate loossa kaajjishatenni daa’’ataanote kiiro lexxitanni dagganno gede assinoonni yiino. Daa’’ataano, Itophiyu wosina adhate budinni haa’ne koyisatenna danchu garinni koyisantanni keeshshitanno gede assinanni hee’noonnitano kulino.
Baxxinohunni, konni albaanni daa’’ataanote iillo ikkitino base cufante keeshshitinoti haaru garinni daa’’ataanote fano ikitanno gede assinanni hee’noonni. Daa’’ataanote woxu wolqa gawajjannokki garinni baattannonna owaante uytanno uurrinshuwa millimmono iibbitanno gede assinanni hee’noonni yiino.
Itophiyaho ayirrisantanno Gannunna Cuuammete ayyaanna ayirrisate babbaxxitino kalqete kifillanni dagganno daa’’ataano keeshshitanno yanna seeda ikkitanno gede babbaxxitino hayyubbanna doorshubba injeessatenni keeshshonsa yanna seedisa dandiinanni. Konni kaiminni, daa’’ataano ayyaannate gobbaanni wolootta daa’’attote base daa’’attanno gede assate loonsanni hee’noonnita coyi’rino.
Tenne yannara haaruudde daa’’attote baseno egensiisatenna daa’’atisiisate loonsani hee’noonnia kulinohu kalaa Kibroomi; kunino dagganno daa’’ataano haaruudde baseno iillite daa’’attanno gede assannota qummeessino. Albaanni noo daa’’attote iillora ledote haaruudde ijaarranni hee’noonni daa’’attote base halaalaancho mashalaqqenna atjubba agrunni hinkiille maareekkatenna egensiisate loosi woyyaawino garinni loosamanni noota coyi’ranno.
Daa’’atto (Turizime) haammata hajubba giddose hanqaffe amadatenni daa’’ataanote shiqqanno owaante ikkase kulinohu kalaa Kibroomi; handaarunni seyoote iillate Diilallote doogo, daa’’atisiisaano uurrinshuwa, owaante uytanno uurrinshuwa, Ministere loosu mininna qoqqowubbate handarunni loossanno Biiro qinaabbe loosa noonsata qummeessanno.
Ikkinohura, kuri jajjabba ayyaanna ayirrinsanni yannara gutunni mittu illachira loosa hasiissannota huwachishanno. Konni ragaanni, baxxinohunni Gannunna Cuuammete ayyaanna danchu garinni ayirrisantanno gede maamaru handaarunni hajo la’annonsa bissanni ledo loosanni noota kulino.
Xaa yannara Itophiyaho lamente ayyaanna ayirrisamanni ledo amadisiisaminohunni daa’’attote millimmo iibbitinota ikkasenni Turizime ministere widoonni babbaxxitino gobbuwara heedhannore ‘’Layinki ilana Diyaaspora Itophiyu qansoota’’ gobbansa dagga dhaggensanna budinsa ledo egennantannonna xaaddanno gede woshshatto assinoonni. Kunino, daa’’attote handaari lophora ledotenni kaayyo kalaqannoha ikkasi xawinsoonni. Itophiyu daafira konni albaanni egennonna huwatto noonsakki qansooti gobbansa dagge dagoomu ledo xaaddanno gede assate hedo jawaachinshannita ikkaseno kulloonni. Baxxinohunni, jajjabba ayyaanna ayirrinsanni yannara gobbansa dagganno gede woshshatto assa umisenni dancha kaayyonna dago ikkitinota xawinsoonni.
Gobbansa dagganno gede woshshatto assinoonisari Layinki ilama Diyaaspori wedelli yannitte hayyo seekkite huwattannoreeti yaanohu kalaa Kibroomi; shiimu xiqqeessi giddo kalqete ikkinore afanna affinoreno iillishate dandiisiissanno egenno noonsare ikkansa kulanno. Tini aja dume yannitte hayyo doorshubbanni Itophiyunnita daa’’attote iillo basenna handaarunni noonketa kalaqamunna mannu loosino jiro kalqete egensiisatenni daa’’ataanote kiiro lexxitanno gede assate dhuki noonsata coyi’ranno.
Baxxinohunni, xaa yannara ayirrisantanni noo ayyaannara basete leellite Dijitaale doorshubbanni tuqissanno mashalaqqe Itophiyunnita dancha macca bowirsitannote yaanno.
Tenne yannara woshshatto assinoonninsari gobbaydi gobbuwara heedhannori Layinki ilama Itophiyu qansooti noonsa egennonna jiro Itophiyu daa’’attote handaarira hosiisa dandiitannoreeti yiino. Konni kaiminni, mootimma assitino woshshatto gumulantannonna gobbansa daggannori Itophiyu qansooti daggino illacha gumultanno gede maamaru qeechasi fulanno. Qansootu gobbansa bude, dhagge, Donanna kalaqamu jiro seekkite affanno gede heedhanno gobbuwa Afuubbanni egensiisatenna daa’’atisiisate maamaru qixxaawo asse loosu giddora eino.
Sai Sambatu barra ayyirrisaminohu Gannu ayyaanino ikko muli barrubba giddo ayirrisamannohu Cuuammete ayyaani amma’note harunsaanora huuccattotenna maarote ayyaannaati. Amma’note harunsaano ikkitinokkirira kayinni mittimmate, fakkanimmate biinfillinsa malaateeti yiinohu kalaa Kibroomi; ayyaana lainohunni Itophiya dagganno daa’’ataanonni horaameeyye ikkitannori amma’note harunsaano calla ikkitukkinni wo’manta gobbate qansoota ikkasi kayse; baalunku hornyubbansa garunni agaranna annimatenni macciishshamme kalaqa noonsata huwachishino.
Amsaalu Felleqe
Bakkalcho Arfaasa 2, 2016 M.D
