Kiristinnu amma`no harunsaano diru tuqa iibbadu garinni ayirrissanno ayyaanna mereerinni gannu ayyaani mittoho. Gannu ayyaana ayirrinsanni gari qooxeessu qooxeessu garinni babbaxxinoha ikkirono; diru dirunni haaro coyibba lendanni iibbino garinni sufanno gede assinanni afammanni. Iibbino gedeennino sufanni dayino ayyaanaati.
Konni ledo amadisiisame gannu ayyaanira babbaxxitino qooxeessubbara labballu godo`litannoti gannu godo`le ka`anno. Gannu godo`le amma`note xawishshimma gobbaanni baca coye leellinshanni qixxaawubbano noose.
Kiristoosi ilama ayirrinsanni ayyaani day kiiro gannu godo`le godo`la Itophiyaho baxxinohunnino hundanni rosantinote.
Gonnu godo`le mamoote hanaffinoro xawissanno mashalaqqe hee’ra hooggurono; yesuus kiristoosi ilamara albaanni noota kullanni.
Baatto loosidhe galtinori goyirete yannara gidensa gamba assituhu gedensaanni lalonsa alaaltanni xawo basera godo`litanno godo`leetino yinanni gannu godo`le.
Gannu godo`le yannara kiiro fushsha, sirba, godo`le rosantinote. “Gannu godo`lera dihanqanno mootichu; gannu godo`lera ashikaru mootichu dino” yinanni kiirrannitano kullanni.
Gannu godo`le umise amma`note amanyoote afidhino. Baxxinohunni kiristinnu amma`no harunsaano ragaanni jawa bayicho uyine iibbadu garinni ayirrinsanni ayyaanaati. Kuni ayyaani amma`note balchoomma ikkasi gobbaannino dagoomunniha budu balchoommanna wolootta qixxaawubbano leellinshanniho.
Gannu ayyaani Yesuus biilinke ilama korkaata assatenni Ameerikahonna Awuropu gobbuwara hattono Itophiyaho baxxino garinni ayirrinsanni ayyaana ikkirono;gannu ayyaani maatiro horontanni affinokki gobbuwano noota affinoonni? Chayinu gobba gannu ayyaana ayirrissannokki kalqenke gobbuwa mereerinni qara ikkitanna barruno wolootta barrubba gede loosu barra ikke hosanno. Afgaaniistaane, Afikunniti Aljeeriyu, Liibiyunna Moritaaniyuno konne ayyaana ayirrinsannikki gobbuwa ikkitanna; kiristinnu amma`no harunsaano hoogansa qole ayyaanu ayirrisamannokki gede qara korkaata ikkinota kullanni.
Isiyunniti Mongoliya gannu ayyaana ayirrinsannikki gobbaati. Gobbate qansooti budihiistete amma`no harunsitannohura. Aliyye kooriyi, Pakisitaane Sawudi Arebiyunna woloottano batinye gobbuwa kuni ayyaani ayirrisamannokki gobbuwaati. Mite mite gobbuwa kuni ayyaani horontanni ayirrisamannokki gedeno seeru wodho noonsa.
Ameerikanna Awuropa lede haammata kalqete gobbuwa gannu ayyaana sa`u lamalara ayirrissinoha ikkanna; Itophiyu qole Yesuus Biilinke ilama ayyaana Sadaasa 28ni ayirrissanno. Konne ayyaana ayirrisate gobbate babbaxxitino qooxeessubbara daga qixxaawonsa assitanni afantannota la`nanni hee`noommo.
Millinseemmo olluubbara baala uduunnu suuqqara duummaaddanna waajjo uddano, gannu haqqicho, addi addi kuuliti calallaqqanno uddanna, postikaardenna labbinori illete baxissanno garinni sutantino. Anino sa“eemma dooggara kuri baala la“anni mito xa`manni sa`eemma. Gannu dikko iibbite no. Baazaarrano fanante babbaxxino uduunne shiqishatenni owaattanni afantanno.
Lekka mininni fultolla ikkinnina la`nannikkirinna hidhate halchinannikkiri dino. La`niri baalu wodana goshooshanno. Dikkidhara fultino lekka bati’rase korkaatinni dooggate aana mimmito xixxiimbanninna riiqantanni ha`nanni. Tayixehuno gannu ayyaani konni albinte gede iibbadu garinni ayirrisamara barrubballa gattino. Konne ayyaana ayirrisate addi addi garinni quqquxantine agartinoonni baalira dancha ayyaana ikkanno`ne gede qixxaawonke kifile halchose xawissanno. Dancha gannu ayyaana ikkonke!
Abbebech Maatewoos
Bakkalcho Sadaasa 25, 2016 M.D
