Addis Ababa:- Cancishaanchimma diilallote gade soorro gede kalqoomu daga gutu sharro hasidhannota kalqete jaddo ikkase anfanni hee’neenna Awuroppu Itophiyunni gurcho ikkino garinni uurransa saalsiissannota ikkase Itophiyu Sivil Servisete Yuniversitera Dippilomaasete rosiisaanchi kalaa Indaale Nigusehu xawisi.
Kalaa Indaale Awuroppu kalqe cancishaano HWHT iillishshanni noo assoote giwate fajja hoogansa lainohunni baxxinohunni Itophiyu Pireesete Uurrinshara xawisino garinni; Cancishaanchimma diilallote gade soorro gede kalqete daga gutu sharro hasidhannoti kalqete jaddooti. Awuroppu kalqe konne halaale badhera qolte agurte Itophiyaho gurchunni uurransa saalaho.
Cancishaanchimma Itophiyu calli yaaddo asse adha jawa so’ro ikkase xawisinohu kalaa Indaale; qarru jeefote Itophiyunni sae gobbayidi gobbuwano gawajjitannota ikkase digattannote yino.
Awuroppu gobbuwa harinshotenni umonsano gawajjanno loosi aana beeqqitanna tini umita di ikkitino yinihu kalaa Indaale; Itophiyu Xaaliyunni amadami yannara Awuroppu gobbuwa Naaziyootu qotira uurratenni Itophiyu hajo la’e la’inokkihu gede sa’inota qummi assino.
Awuroppu gobbuwa cancishaano HWHT cancu millimmonna assoote la’anni heedhe la’inokkihu gede sa’’ansa higge umonsa gawajjitannotaati rosiisaanchu Kalaa Indaale coyi’rinohu.
Kalaa Indaale xawishshi garinni; Itophiyu cancishaanchimma gargaratenni kalqete keerinna ga’labbora luphiima kaa’lo assino. Baxxinohunni Soojjaati Afriki keeri mitiimma ikkinoha kalqoomu cancishaancho Alshebaabi kalqoomu daga ledo halamatenni olante jawa qeelle borreessiissanni keeshshitino. Konninnino Alshebaabi qooxeessaho iillishara dandaanno gawajjo ajisha dandiinoonni.
Gobba cancishaanote aana jawa qeelle borreessiissanni keeshshitinoha ikkirono xaa yannara gobba giddoyiditi cancu gaamo mitiinsitanni noota kayisinohu kalaa Indaale; HWHT gaamo ranketenni hanaffe annoomittete qoosso amadooshshi qarrubbanna woloota qoosso xiiwonni afantannore ikkansa qummi assino. Konne gaamote assoote gobbaydi gobbuwa uminsa affinotanna tajetenni irkisaminoha ikkasi egensiisino. Ikkirono gobbayidi gobbuwa Itophiyu tenne wolqa hunate assanno sharro irkisantenni wirro qolte xiibbanni afantanno. Tini lowo geeshsha dadillissannote yino.
Kalaa Indaale egensiisino garinni; HWHT biilloonye amadde noo yannara gobaydi gobbuwa hajo gumulsiisaano ikkite owaattino wolqaati. Aanteteno horonsa agarsiisi’rate hasidhanno daafira ba’ara dihasidhanno. Konninni kainohunni Itophiyu tenne wolqa hunate assitanno sharro irkissanni di afantanno. Xaa yannara HWHT dagate riqiwamaano amaale mine cancishaanchimmatenni gaammeenna olantanni nooha ikkirono kalqoomu daga baxxinohunni umonsa mannoomittete qoossonna dimokraasete agaraancho assite la’annoti gobbaydi kalqe Itophiya irkisantenni cancishaanote yinoonni bissara babbaxxitino irko assitanni afantannota qummi assino.
Gobbayidi gobbuwa harinshonsa uurrite la’’a hasiissannonsa. Itophiyu daga kayinni noo halaale kalqete xawisatenni qoteho gobbayidi gobbuwa ikkito xawo fushshansa sufa hasiissannonsata coyi’rino.
Qiddist Gezaheny
Bakkalcho Maaja 22, 2013
