Keeru,Baxillu,Araarunna Shooshanqe Yesuusi ilamanni

Keerunnire,mittimmannire,baxillunna araarunnire tenne kalqe aana Yesuusi gobbaanni rosiisannonkehu dino. Isi ninke woxxara,ninkera lawishsha ikke rosiisara tenne kalqe Manchu beetto ikke hadiro ilamino. Ilameno woxxinonke.

Kiristinnu amma’no rosiissanno garinni luphiima base uyinanni ayyaanna mereerinni amma’note hanafonna gumulo ikkinohu Mootichu biilinke Yesuusi ilama qaanganni gannu ayyaani mittohonna albisa ayyaanaati. Korkaatuno kalqete xagichootiyya ilaminohu. Ilamasi korkaati gatote sokka amaddinote. Ilamannotano albi Nabiyaatooti himantinote;konnira ilama hexxotenninna qalli yite agartanni keeshshitino Yesuusaati ilaminohu.

Mootichu Yesoosi ilamishshi umisi tenne kalqera haa’re dayino kalaqamu hexxonni kainohunni bacu tenne ikkito gotti assite hagiirrunni adhiturono;isi ilamasi haadhe daggino hexxo halaale ikkitannokki gede jawa gede hunotenna baote loosi aana dirantinori hee’ransa dhaggete ikkito mitto bisooti. Togo yaa Mootichu ilamino yinita mootimma hasidhanno manchi beetti ilama addintanni giwisidhinosi. Isi kayinni kalqete mootichaati ilaminohu.

Kuni mootichu biililinke Yesuusi manchi beettira baalaho gatote hexxo ikke xawinohu Kaaliiqi gaatote hexxo qaali ilamannokki gede,ilami gedensaannino hegereha ikke xawannokki gede,konninni gatote hexxo ikkitannokki gede cancunna kakkachu beetti noosi dhukinninna egennosi geeshshinni dandaannore baala assatenni badhe dihigino.

Hexxote qaali ilaminota hagiirru duduwo jawu masillinni macciishshinohu hunote beetti Mootichu Heerooddisi widoonni ilamasi adda ikkitinota meessisi biilloonyi yortonni ledo amadisiise co’ontanni macharaarrete kakkachimmanni Beteliheemete quchuma qaaqquullu mundeenni hayishshasi tenne dhagge biso ikkite sa’ino. Isitero labbaa qaaqqi kalqete mooticha ikkanno yine himannoonnihu ilaminohura hiikkonneetiro bade afa hooge hattenne yannara ilantino qaaqquulle shee guda Yesuusano hakkaanni shaateetinkanno. Kayinnilla dikkinosi.

Agarranni keeshshinoonni kalaqamu hexxo meessisi biilloonyi goo’ronni dimbe hunara hasi’rino harinsho Heerooddisihu co’ontanni macharaarrete assooti Beteliheemete hiikkonne waagano baatisiisiro;hexxote qaalinna qaalu ilamannota kayinni hoola didandiino.

Konni sanira Itophiyaho xaaddanni noo jifono togoote. Mitte sa’niro wole doogonni goxannokki ibiliisi hunda Yesuusa xagicho nafa ilamannokkinna hegereha ikkannokki gede assate wo’naalinonkanni;kayinnilla di tolinosi. Yesuusi qeele xaa geeshsha tenne kalqe xagichonna mooticha ikkella no. Itophiyahono xaaddanno jiffa togoote. Itophiyu yanna yannatenni gannanni sharrenni sa’annilla daggino. Techono sa’anno;mayira yiniro hexxote qaali noose gobbaatiyya!

Keeru,Baxillu,Araarunna Shooshanqe Yesuusi ilamanninni dagginote. Keeru boo’raawanno woyte Yesuusi assinonkere qacce qolloommo yaate. Ayyaana ayirrinseemmohu godowa duuwate,uddi’re biifatenna ita agate dikkino. Qaanganniri hee’ra hasiissanno. Shooshanqe qarraminoha kaa’late assinanni dancha loosooti. Qarraminoha kaa’linanni woyte Yesuusi ninke qarra tirate ilaminota qaangeemmo.

Gobbanke lophote doogo iillitara assitanno millimmora kayinni gutamanna guutama hasiissanno. Itophiyu baca budenna balchooma afidhino gobbaati. Amma’nono hattonni. Gannu ayyaana ayirrissannori roorima Kiristinno amma’no harunsaanooti. Itophiyu Oritodokisete amma’no harunsaano lendanna Kaatolikenna Pirotestaante baala gannu ayyaana hagiirrunni ayirrissanno. Gutunnino Yesuusa guwissannanna faarsitanna la’nanni. Togoo mittimma giddo baxillu,keeru,araarunna shooshanqe noota huwata dandiinanni.

Anje hee’re baadiyyete leeltanno Pirotestaantete amma’no uurrinshuwara gannu ayyaana agare harunseemmoti techo qaagantue. Moola waasa mini mininkenni amuwinke qixxeesseenna adhine Huuccattote minira ha’neemmo. Barraho huucci’nenna Kaaliiqa galante ka’nummoro hurbaaxxineemmo amanyooti addankanni techo qaagamannoe.

Waasa hookkichu aana diriirsinanni. Aju akkali,meyaa labbaahu dirame ofollanno. Noosihuno noosikkihuno,afi’rinohuno hooginohuno mittu hurbaati aana ofolleenna moolu waasi aana Waco dunne kotta kotta maala tuttungoonniha ita techo hakkonne halcheemmo gede assitinoe.

Mittimma hakko no. baxilluno hattonni. Hooginohuno duuwe ha’ranno afi’rinohuno hooginohunni ledo mitteenni hurbaaxxe bashsho Yesuusi 12 Hawaariyaatootinni ledo gamba yee hurbaaxxino malaate hakko barra leellishshanno. Konne roorino baxilli mama nooyya? Mittimmanna mimmitoho kaa’lama tenne roortinoti nookka? Xaana hakku amma’note amuraati gannu barrihuna? Ki’nenkura.

Maganu dironke hurso; mittimma, baxillenna keere tophiyaho dirriso! Kakkachuullu hexxo irraabbo! Dancha ayyaanna!

Yaareed geetaachew

Bakkalcho Sadaasa 25, 2016 M.D