Itophiyu laashshitanna qansootuno geexidhanno harinsho kalanqoonni millimillo hanafantunkunni deerru deerrunkunni laashshaanchimmate dhuki lexxanni dayno.
“Itophiyu Laashshito” yaanno massagote qaalinni gobboomu deerrinni hanafoonni millimillo kawa gobboomu deerrinni Industirete, gibirinnunna woloottano addi addai handaarranni laashshate dhuki lexxanni dayno.
Tenne gobboomu millimillohu qaru illachi laashshaano Industirra halashshatenni xaaddannona qarrubba tiratenna laashshate dhukansa lossate, handaarunni sufino latishshanna heewisamaanchimma lossate, hattono miinju taqqa reekkora handaaru agarranni qeecha fulanno gede dandiissiisate.
Soorrote kawa Industirete latishshi handaarira jawa illacha tugatenni laashshaano Industirra batinye halashshatenni handaara lossate mixi’ne loonsanni hee’noonni. Laashshaano Industirra uminsa poolisenni massagantanno gede assinanni hee’noonni.
Konni albaanni gobbaydi dureeyyera balaxo uynanni harinsho gatteenna xaa yannara gobbate giddonna gobbaydi dureeyyera taalo illacha uyneenna handaarunni bobbakkanni afantanno.
Gobboomu deerrinni 2014M.D hananfe “Itophiyu laashshito” yitanno millimillo hananfoonniha ikkanna; laashshaano Industirrara addi irko assinanna loosidhanni afantanno.
Gobboomu deerrinni hananfoonnita tenne millimillo xaa yannara qoqqowubbatenna quchummate deerrinnino deerru deerrunkunni kaajjinshe harinsanni hee’noonni.
Sidaamu qoqqowira haammata ikkitannori manaaddanna mereerima laashshaano Industirrara hasiissanno irko assineenna dhukansa loossidhanno gede assinoonni.
Albillichono 19 ikktannori irko hasidhannore laashshaano Industirra jawaachishate loonsanni hee’noonnita kulloonni.
Gobbuwate lopho keennanni safaraanchi mereerinni mittu Industirete handaara ikkasi kullanni.
Tenne millimillonni Industirra laashshitannorinni gobbate giddo laalchimma lophora assitanno qeechi lexxanno.
Industirra laashshate gobbaanni tekinolojete reekkora, loosu kaayyo kalaqora hattono gobbaydi woxu soorro fulo ajishate ragaanni jawa qeecha afidhino.
Itophiyaho konni albaanni boode latishshu handaarra calla illacha tugatenni loonsanni keeshshinirono hasi’noonni garinni lopho daggukkinni keeshshitino.
Konni kaiminni, lopho gufidhanno gede qara ikkitino korkaatta badatenni gobboomu deerrinni qara qara miinjunna lophote taqqa yine onte handaarra bandoonni. Ikkinohura, baalante handaarra kayinni taalo illacha tugate wo’naallanni hee’noonni.
Baxxinohunni, gibrinnu (saadate jiro latishsha lede), Industire, Daa’’atto, shiilonna ICT handaarra gobbate lophora qara taqqa assine bandoonnireeti.
Konni albaanni Itophiyu Qamade gobbaydinni hidhitanni keeshshitino. Tenne yannara kayinni gobbaydinni eessinanniha Qamadete laalcho gobbate giddo hala’ladunni laashshinanni riqiwatennino sae wolootta gobbuwara shiqisha hananfoonni.
Kunino, gorsunninna way injo horoonsi’ratenni dirunni lamenna hakkonni ale yannara laashsha dandiinoonni daafiraati. Qooxeessubbate noo injonna elto mucci assine horoonsi’nanni laashsha dandiiniro agarranni guma maareekkisiisatenni gufisannori dino.
Industirete ministere gobboomu deerrinni Industirete reekko assate dandiisiissanno harinsho aana illachishatenni xaaddannota womaashshu, dikkotenna dhuku anje xe’ne badatenni irko assitanno.
Wole widoonni, addi addi gibrinnu laalchubbano bikkunni lexxitanno gede jawa qeecha afidhino millimillooti. Konni kaiminni, loosidhe galtinori ikko Industirra laashshate dhukinsa yanna yannatenni lexxanni daynoti xawoho.
Konnira, handaarunni xaaddanno qarrubba tiratenni hasi’nanni soorro abbate baalunku qeechasi fula noosita agarranni.
Tini gobboomu millimillo wolootta gobbuwaha dancha rosicho adhatenni laashshaano Industirra laalchimma lossatenni heewisamaanchimma hattono gumaamimma lossateeti.
Kunino, laashshaano Industirrara jawa illacha tugatenni haaruudde Industirranna laashshaano handaarra kalaqatenna goshooshate, albaanni noore dhukansa kaajjishatenni laalchonna laalchimma lossatenni gobbanniha woyyaawa miinju dhukanna jiro kalaqate dandiissiisanno.
Gobba Industirete widira reekkama hoogguro buximatenni fula ajuuja calla ikkite gattanno.
Mitte lophote kaayyo calla harunsa hasi’noonni lopho diabbitanno. Konnira, hanqafaancho lopho widira reekkama doorshu nookki hajooti.
Laashshaano Industirrara dikkote xaadooshshe kalaqa hasiissanno. Kuni ikka hoogiro loosi’noonnihu hasiisanno illachira hosannokki daafira daafurre gantanni. Laashshaano bissa jawaachishatenna laalcho dikkuwate batinyunni shiqishateno dikkote xaadooshshe kaajjinshe sufisiisa hasiissanno.
Tenne yannara handaaraho uynoonni illachi baxxinoha ikkasinni hasiisannore wonshatenni hixamanyine loonsanni hee’noonniha ikkanna; deerru deerrunkunni gibrinnunna addi addire Industirete laalchubba dikkuwate shiqishate baazaarenna reqeccono suffanni afantanno. Kuri loossa jawaachinshannireeti.
Konninni, haaruudde Interpirayzoota loosu giddora eessatenni handaarunni afi’nannihu gobbaydi woxu soorro bikki lexxanninna laashshano bissa heewisamaanchimmate dhuki lexxanni ha’ranno.
Tini millimillo jiroo’mitino Itophiya adda assate amandoonni ajuuja timo gantanno gede hala’lado kaayyo kalaqqannota hendanni.
Amsaalu Felleqe
Bakkalcho Onkoleessa 14, 2017M.D
