“ Xashshunna Roggaame Baatto Qooxeessira Heedhanno Daga Qoropho Assa Hasiissannonsa”Kalaa Aberra Wiila Sidaamu Qoqqowi Danote Bidhatto Loosu Massago Komishiine Komishinere

Gananni noo xeenni gawajjo iillishan­nonsakki gede baxxinohunni qoqqowoho Xashshunna Roggaame baatto qooxeessira heedhanno daga qoropho assa hasiissan­nonsata huwachishshino sidaamu Qoqqo­wi danote yaaddo loosu massago komishi­ine.

Komishinerchu Kalaa Abarri Wiilahu baxxinohunni Bakkalcho Gaazeexira xaw­isino garinni; Tenne hawadi yannanni ga­nanni noo xeeninni lolahunna baatto shirri yaate dano kalaqantara dandiitannohura xashshunna roggaame baatto qarqartora heedhanno daga qoropho assa hasiissan­nonsa yino.

Qoqqowoho diilallote gade soorro sai Badheessu yannara loosidhe galtino daga aana mitiimma kalaqqe sainota kayisinohu Komishinerchu; xeenu yannasinni gana hoogasinni 13 woraddara 70 Kumi Hek­taare baatto aana winxoonni wixi bainota qummi assino. Gurchunni Bilaatte Gaan­gaawi woradira Bilaatte xashshi wo’me 40 Hektaare baatto aana dano iillishinotanna Hawadi xeeninni Booni Gaangaawi wo­radira ganino du’mu xeeninni Ereerte xash­shi wo’masinni Ontu manni daraminotan­na 10.5 Hektaare baatto aana winxoonni gidi aana gawajjo iillitinota xawisino.

Xa Goyrete yannanni du’ma xeena gananni nooha ikkasinni mannunna jajju aana lola­hu dano iillitannokki gede Komishiine bal­axote qixxaawo assitinnoota xawisino.

Konnirano sai aganira Qoqqowu Gi­wirinnu biironni massagamannoha Rosu,Fayyimmate, quchumu latishshi bii­ronna wolootano Qoqqowu biiro sooreeyye amadinoha danote yaaddo loosu amaale mine uurinsoonniha ikkanna danote yaad­do loosu massagaano yine bandoonniri amaalete mini miillara mootimmannita ik­kitinokkiri kaa’laano uurrinshuwara danote yaaddo massago Polisenna Istraateeje shi­qinshe kaajjinshihu gedensaanni qixxaawo assinanni hee’noonnita xawisino.

Hattono hedeweelcho kalaqantanno danora sagalete qixxaawo assinanni hee’noonni yinohu komishinerchu Abarri; konnirano 3000 Kuntaala gidenna darte kalaqanturo yannate geeshsha fooliishshi’nanni base qixxeessinoommo yino.

Ledoteno Doqdoqqetenna Kaameelu oo­faanono xeeni yannara ooffanno woyte wole yannanni aleenni qoropho assitanno gedenna wo’mino waa tayisse sa’anno woyteno hattonni lowo qoropho assa hasi­issannonsata komishinerchu kalaa Abarri huwachishinno.

 Qiddist Gezaheny

Bakkalcho  Maaja 22, 2013